Champion beisei Real an chak

Inrinni zan La Liga inkhelah Real Madrid chuan 2-0 in Osasuna an hneh a, champion beiseina an chhi nung ve zel - Real tan hian Federico Valverde leh Marco Asensio te chuan goal khat ve ve an khung a, Osasuna-in a chhanletna tur an nei lo.

Real tan striker chhuanvawr Karim Benzema chu hliam vangin a inlan thei lo a, French striker tel loin Real tlarhma a bil chhunzawm - first half chhungin goal an khung lo a ni mai lo a, a bet zawkah an ṭang hial.

Second half-ah erawh Real an insiamṭha a, an goal nawr a na sawt. Madrid khaw club tan Vinicius Jr chuan goal a khungah inngai mah se offside vangin pawmsak a ni lo a, minute 78-naa Valverde khung erawh sawisel rual a ni lo - Vinicius siamsak a ni.

Hun pek belh minute hnihnaah Asensio chuan chak nemnghehna goal a khung ve leh bawk - kum 18 mi Alvaro Rodriguez siamsak a ni. Vinicius vanneih zan a ni lo, tiin a sawi theih - Valverde goal khung hnuah a khung ve lehah a inngai a, mahse, offside vang bawkin pawm a ni lo.

A tawpah erawh Real an chak ta tho a, hmahruaitu Barcelona nena an inkar chu point ngain an sawr zim a, match khatin an khel tam thung. Barca hi nizan khan an inlan a, Cadiz an hneh chuan Real nena an inthlauhna a sang leh sawt ang - he thu buatsaih a nih lai hian an result kan hre hman lo a ni.