ISL playoff khel tur Bagan

Match thum chhung a zawna an chak zawh loh hnuah ATK Mohun Bagan an chak ve leh ta. Inrinni zan khan 2-1 in Kerala Blasters an hneh a, ISL playoff an khel dawn.

Kolkata khawpuia inkhelah Blasters tan Dimitrios Diamantakos chuan goal hmahruai khung mah se, Bagan hian Scottish midfielder Carl McHugh-a goal hnih hmangin an chhanglet a, a tawpah 2-1 in an chak - Blasters forward Rahul KP chu minute 64-naah a yellow card pahnihna avangin hnawhchhuah a ni a, 1-1 a team pahnih an inhnehtawk lai a ni.

Blasters aṭanga January transfer-a Bagan zawmtu K. Lalṭhathanga'n bul ṭan lo mah se bench aṭanga luhtir a ni a, a team hlui an hneh thei hi a lawm khawp ang - Blasters hi tlawm mah se, playoff khel turin an tling tawh sa a ni.

Inrinni zan ISL inkhel hmasa zawkah playoff tling chiang tawh Hyderabad FC tan Lalbiakhlua Jongte chuan si ban a nghak a, mahse, Mizo keeper-in ISL-a a match hmasa ber a khelh zanah an mikhual Jamshedpur chu 3-2 in an ngam lo.

Hyderabad tan Bartholomew Ogbeche chuan goal hnih khung mah se JFC tan Ritwik Das, Jay Thomas (penalty) leh Daniel Chukwu ten goal khat ṭheuh an khung a, 3-2 in Men of Steel an chak - minute 55-naah JFC player Eli Sabia hnawhchhuah ni mah se, player 10 an nih hian goal thum an khung tawh a, harsatna liantham an tawk zui lo a ni.

Hyderabad tan Biaka bakah hian bench aṭangin midfielder pahnih Lalchungnunga Chhangte leh Mark Zothanpuia te an lut a, JFC tan Laldinliana Renthlei leh Ricky Lallawmawma ten inkhel bul an ṭan bawk.

Zirtawpni zan khan Odisha chuan ISL khelh beiseina chhi nung turin NorthEast United chu 3-1 in an hneh bawk a, an match tawp bera Jamshedpur an hmachhawn hunah draw result an hlawhchhuah theih chuan playoff an khel ang.

Odisha tan Nandhakumar Sekar, Victor Rodriguez leh Diego Mauricio (penalty) ten goal khat ṭheuh an khung a, NorthEast United tana hun pek belha Wilmar Jordan-a penalty chhuih luhin awmzia a nei phak lo.

Guwahati khawpuia inkhelah Highlander tan R. Laldanmawia chu bench aṭanga luhtir a ni a, Odisha lamah Isak Vanlalruatfela'n bul ṭanin, Jerry Mawihmingthanga leh Isaac Vanmalsawma te bench aṭangin an lut bawk.