Italian Serie A hmawr an bawk

Pathianni zan khan Italian Serie A 2019-20 season chu khelh zawh a ni. A zawna a vawi kua nan Juventus an champion laiin Lecce, Brescia leh Spal te an tla. Serie B aṭangin Benevento leh Crotone te chuan season tharah Italian football inelna sang ber hi an khel dawn a, hmunruak pakhat la awm chu playoff hmanga chinfel a ni thung ang.

Italian football roreltu chu a ngai 'Juventus' bawk an ni leh a, a zawna season kua zet an champion theih avangin midang chunga leng an ni chiang hle. Mahse, kuminah hian season kua an champion chhunga point an hmuh tlem leh chak loh hnem ber ṭum an tawng.

Turin club manager Maurizio Sarri chuan, "Harsatna leh buaina hrang hrang kan hmachhawn a, chutiang chunga nomawi kan chawi thei hi a lawmawm," a ti. League goal 43 an chhuah chu season riat hnua an chhuah hnem leh ber  a ni. Old Lady hian Champions League khelh hmabak an la nei, last 16 second leg-ah Lyon an mikhual dawn; an intawn hmasakah 1-0 a an chak loh avangin thapui an thawh a ngai dawn - Coppa Italia final-ah erawh Napoli an ngam lo.

Antonio Conte enkawl Inter Milan chuan 2011 hnua season an hman ṭhat ber ṭum an tawng a, pahnihna niin match hnuhnung ber an khelh hnuah Juventus an phak lohna chu point khat chauh a ni a, nomawi erawh an chawi lo.

Conte naute hian an match hnuhnung berah an elpui Atalanta 2-0 a hnehin pahnihna dinhmun an sawhnghet. Season hmang ṭha pangngai viau mah se Conte dinhmun a derthawng nia sawi a awm, Italian manager hian player lei nan sum a hmang hnem viau a ni.

Inter manager Conte chuan, "Mimal tak chuan season harsa tak a ni, harsatna hrang hrang thleng karah club president  Steven Zhang chu China-ah a awm daih si, thil sawidun theih a ni lo. Duhthusam thleng chiah lo mah ila a ṭha thawkhat chuan ka hria," a ti.

Atalanta chuan season hmasa ang bawkin pathumna dinhmun an luah, nikuma an point hmuh (69 points) erawh point kua ngawtin an khum thei a, manager Gian Piero Gasperini kaihhruaina hnuaiah hma an sawn zel.

Goal 98 khungin Serie A team zinga goal khung hnem ber an ni zawn a, hri leng hluarna Bergamo hmunpuia awm ni mah se inkharkhip hnuah chauh pawh goal 35 an khung thei. Luis Muriel leh Duvan Zapata ten goal 18 ve ve an khung a, goal 15 khung thei Josip Illicic an nei bawk.

Gasperini naute hian Champions League an khelh hmasak berah quarterfinal an lut fel tawh. French champion Paris Saint-Germain nen August 13, Ninganiah semifinal lut tur zawk an zawng ang - Italian club hi zuam sual theih tur tak an ni.

Inkharkhip lai khan Juventus leh Laizo inthlauhna chu point khat chauh a ni, hripui len hnua match an khelh leh chinah Lazio an talbuai a, hun rei tak chhung nomawi an nghah tawh chu an nghah chhunzawm leh a ngai dawn.

Champion lo mah se palina an ni a, an chunga awm Atalanta nen an point hmuh a inzat. Kum 2007 hnua a vawi khat nan Champions League an khelh phak dawn avangin manager Simone Inzaghi hna thawh hian fak a phu.

Lazio striker Ciro Immobile-a'n goal 36 khungin, season khat chhunga Serie A goal khung hnem ber Gonzalo Higuain a nihrual a, an rama football inelna sang berah a hming a chuang reng tawh dawn.