Zverev dinhmun a chiang lo

Alexander Zverev chuan tun thla tawpa khelh tur US Open-ah a inlan dawn em tih a la sawi chiang thei lo. Covid-19 hluarna New York khawpuiah hian player ṭhenkhat chuan zin luh an hreh a, inhnukdawk pawh an awm nual.

Kum 23 mi Zverev chuan, "Tournament khelh ka chakin ka nghakhlel tawh hle, mahse tun dinhmunah chuan US hi inkhelh nan a him em tih chu ngun taka ngaihtuah a ngai. Thil thleng thei hrang hrang ngaihtuah hnuah ka team nen thutlukna kan siam ang," a ti.

World number 7 Zverev hi player beisei awm berte zinga mi a ni a, Grand Slam huangah erawh a la hlawhtling lo. January thla khan Australian Open semifinal a lut a, hard court inelna lian hmachhawn leh a châk a nih pawhin a mak lo ang. US Open aṭang hian hmeichhe world number 1 Ashleigh Barty leh amah ang bawka Australian player Nick Kyrgios te an inhnukdawk tawh a, player ṭhenkhat pawh an dinhmun chiang lo mah se Serena Williams erawh inlan ngei a tum.