Mumbai-in league nomawi an chawi ta
Indian Super League-ah final hmangin champion zawn ṭhin ni mah se, league round-a hmahruaitu hnenah league winner nomawi hlan ṭhin a ni - tun season atana league nomawi chawitu chu Mumbai City an ni a, he team-ah hian Mizo pathum an awm a, Lallianzuala Chhangte, Lalengmawia Ralte (Apuia) leh PC Rohlupuia te an ni.
Pathianni zan Indian Super League inkhelah Mumbai City hian 1-0 in mikhual East Bengal an ngam lo a, Kolkata club tan Naorem Mahesh Singh chuan inkhela goal awmchhun a khung.
Mumbai hi an league match hnuhnung pahnihah an tlawm a, mahse, hemi hma hian hmahruaitu ni chungin league round an khar dawn tih a chiang tawh - league winner hian nomawi bakah vaibelchhe 3.5 an dawng tel.
Pathian malsawmna
Mumbai City-in league winner dinhmun an luah theih nana player pawimawh thlang dawn ila, Lallianzuala Chhangte hming lam hmasak loh a harsa - Mizo forward hian a professional career-a a season duhawm ber tia chhal theih a hmang a, Mumbai tan a khel ṭha ṭhin takzet.
Lunglei forward hian league match 20 a khel kim vek a, goal 10 khungin, assist vawi ruk a nei. Lianzuala chuan, "Nomawi han chawi meuh chu a dan a dang zar mai. Kan lo thawhrim ve tawhna zawng zawngte kha a thlawn a ni lo, tih min hriatchhuah tir a, Pathian malsawmna a ni," tiin Vanglaini a hrilh.
Lianzuala chuan an match hnuhnung pahniha an tlawm chungchang sawi zuiin, "Kan khelh dan chu a ngai reng a, chak tumin theihtawp kan chhuah. Chutihrual chuan coach hian khel tam lote tan chance a siam ve bawk a, tuna kan result hian semifinal atan min ti ṭang zual sawt ang," a ti.
Apuia a ngai reng
ISL player man to ber a ni a, pressure a sang ṭhin ang tih a chiang. Mahse, pressure nei lo ang maiin midfielder Lalengmawia Ralte (Apuia) a khel ṭhin a, tun season-ah pawh hmun pawimawh chang zelin, league match 16 a khel.
Vaivakawn rawlthar Apuia hian goal thum a khung a, vawi 629 zet pass neiin a pass dik zawng percentage hi 84.89% a tling a, vawi 56 tackle neiin, vawi 14 clearance leh vawi 14 lai block a nei bawk.
Hetihlai hian midfielder PC Rohlupuia tan erawh hmun a awm meuh rih lo a, season hmasa lama loan-a I League club Kenkre-a khel player tan hmun pawimawh chang turin ṭan lehzual a ngai - Mumbai squad a chhah tih hriat a ṭha.
