Zaninah Mayor's Cup semifinal

21st February, 2023

Aizawl Day 2023 puala buatsaih Mayor's Cup - Inter Ward Football Tournament semifinal chu zanin dar 7:00 hian RG Stadium-ah khelh a ni dawn. Football thiam veng Ramhlun South awmna Ward No. IV-in Zemabawk leh Zemabawk North awmna Ward No. VII an hmachhawn dawn a, an inkhel tawk khawp ang.

Ramhlun South hi Mizoramin Santosh Trophy an champion ṭuma player Lalnunmawia'n (Mawitea) a ho thei a, goalkeeper-ah MPL-a best keeper ni ngun ber Lallawmpuia (Aizawl Venglai) te an neih bawk avangin penalty shootout thlengin an cho khawp ang.

Chutihrualin Inter Village Football hnuhnung ber thlirte chuan Zemabawk Derby 'hot' zia an hria ang a, veng pahnih hian team ṭha tak an nei ve ve. Mayor's Cup-ah hian team pahnih hi an inchhung khawm ta thung a, Santosh Trophy-a Mizoram champion puitu zinga mi David Lalrinmuana chu an captain a ni bawk.

Semkifinal hnuhnung zawk hi February 22, Nilaini zanah khelh a ni thung dawn a; Ward No. XVIII leh Ward No. XII te an inkhel ang.