Liverpool tan fiahna hautak a inchhawp e

Brighton & Hove Albion-in 2-1 a an hneh hnu lawka, Wolverhampton Wanderers-in 3-0 a Liverpool an sawp kha chuan Reds ṭantute tan beiseina tihsan a harsa a, hmabak a thim hle.

Khatihlai khan Merseyside club hian Champions League round of 16-ah Real Madrid an hmachhawn dawn tih a chiang daih tawh a, Liverpool hmelma club fans tam takin fiamthu thawh nan an hmang hial.

Mahse, Real nena an intawn dawn meuh chuan Liverpool hi team danglam an ni leh tawh -Anfield-ah 2-0 a Everton an hneh hnuin, season duhawm tak hmangtu Newcastle United chu khualmualah 2-0 in an hneh leh sak a, rei tak hnuah a zawnin an chak ve leh ta.

Liverpool hi an league match hnuhnung pahnih aṭanga teh chuan season hmasa lawka team hlauhawm tak, tum châkawm lo kha an ni leh tawh - mahse, he team hi tun season-ah an kaltluang lo laklawh a, an che sual leh khut lo ang, tih sawi a harsa. Zanin dar 1:30-ah Real hi an mikhual dawn e.

Theihtawpin aw...

Liverpool-in an match hnuhnung pahnihah result duhawm tak nei mah se, coach Jurgen Klopp tan ṭawng huai a harsa - he team hian tun season-ah team narana ngaih Nottingham Forest, Leeds United, Brentford, Brighton leh Wolves te an ngam lo tawh tlat!

Tun season-a Liverpool tlawmna hi en ila, Real laka beiseina neihpui tur chuan huaisen a ngai. Mahse, an match hnuhnung pahnihah an khel ṭha miau a, an chak ve ve miau a, Reds fan-ten beiseina an nei a nih pawhin dem theih an ni lo.

Magpies laka an chak zawh chiah khan Klopp chuan an hmabak match a lo thlir leh daih tawh. German coach chuan, "Thawhlehniah khawvela team ṭha ber pawl kan hmachhawn zui dawn a, eng nge kan an zel chu kan hria ang. Anfield-a inkhel tur kan ni a, theihtawp kan chhuah ang.

"A hmaa kan ṭhat ang tak khan kan ṭha leh ta, tia sawi tur chuan a la hma hret mai thei. Mahse, theihtawp kan chhuah zel ang a, kan thlen chin chu kan hria ang," a ti a, a la ṭawng fimkhur rih hle.

Beiseina siamtu

Liverpool beiseina siam turin Real Madrid hi season hmasaa La Liga leh Champions League nomawi chawi kawptu, "Real Madrid" kha an ni leh tawh lo - La Liga-a match 22 khelhah vawi thum an tlawm tawh a, Spanish Super Cup final-ah an tlawm bawk.

Real ngam lohte hi Rayo Vallecano, Villarreal, Real Mallorca leh Barcelona te an ni a, Madrid ngamtute an thlir ang a, Liverpool hian beiseina an neih phah a nih pawhin dem theih an ni lo ang.

Liverpool tana chanchin lawmawm lo erawh Real league match hnuhnung bera inlan thei lo Karim Benzema chu Real squad-ah a awm leh tawh a, Anfield-a inlan tur zingah a tel.

Benzema tel loin Real tlarhma a hriam tawk ṭhin lo a, mahse, French striker a awm dawn miau avangin Anfield-ah an zam lo ang. Kum 35 mi striker hian tun season-ah goal 16 ngawt a khung leh tawh a, Vinícius Jr leh Rodrygo an la awm bawk.

Liverpool dinhmun

He thu buatsaih a nih lai hian Magpies laka hliam tenau nei Darwin Nunez dinhmun a la chiang lo a, an match hnuhnung pahniha khel ṭha tak striker hi a inlan thei lo a nih chuan Real tan chanchin lawmawm a ni ang.

Hetihrual hian Diogo Jota leh Roberto Firmino te an dam tawh tih hriat a ṭha a, an theihna anga an khel chhuak a nih chuan Nunez ngai lutuk tur an ni lo. Mohamed Salah hian tun season-ah beisei a phak lo, tia sawi ni mah se, match 33 aṭangin goal 18 a khung tawh.

Champions League-ah phei chuan Egyptian forward hian match rukah goal sarih a khung. Goalkeeper Alisson a pawimawh leh dawn a, a hmaa ding tur Trent Alexander Alexander-Arnold, Joe Gomez, Virgil Van Dijk leh Andy Robertson te tan chetsual a thiang lo.

Rawlthar duhawm Stefan Bajcetic a thiam tak tak leh tak tak loh zaninah fiahin a awm dawn a, ani hi midfield-ah Fabinho leh Jordan Henderson te nen an inkawp thei ang.