Hotshots aia vannei zawk BCA

Nimin chawhnu Mizoram Super League (MSL) inkhelah Zarkawt BCA chuan Mission Veng Hotshots chu 114-113 in an hneh hram a, tun season MSL kal laia match an neih tawh chinah an la chak kim.

R. Dengṭhuama Indoor Stadium, Mualpuia inkhelah boruak a nung hle. Team pahnihin hma an inhruai chhawk zak zak, hun tawp hma second 12.6 chauh awm tawhah team pahnih hi point khat chauhin an inthlau.

Mission Veng Hotshots lamin ball an chang a, basket nei zauh se an lehthal thei. BCA player pawimawh Zonunsanga a foul out zui, mahse champion lai BCA hian Hotshots an dangchat zui thei a, point khat leka an hmahruaina an humhim.

Hotshots tan Christopher Galbreath Jr chuan point 42 a nei a, tualchhung player ṭha Lalrozama'n point 32 nei ve bawk mahse chak nan a tawk zo lo a, match pumpuia point nei hnem ber chu BCA player Joseph Allen (51 points) a ni thung.

BCA hian Bungkawn LB (101-100) leh Khatla TBL (100-98) te hneh turin vanneihna an lo mamawh tawh bawk, chutih rualin inkhel boruak sang leh inum tawk takah tawnhriat an neih ṭhat an chhawr ṭangkai ṭhin.

Nizan khan inkhel pahnih a awm zui a, result kan hre hman lo. Vawiin hian a hmun ngaiah inkhel pahnih a awm leh ang.