Barcelona dang thei an awm lo

La Liga-ah Barcelona an kal zel a, dang thei an awm meuh lo - Catalan club hian Pathianni zan khan an mikhual Cadiz chu 2-0 in an hneh a, La Liga lama an hmahruaina chu an sawh nghet.

Barcelona tan hian Sergi Roberto leh Robert Lewandowski ten goal khat ve ve an khung a, mikhual team Cadiz-in a chhanletna tur an neih loh avangin Barcelona an chak.

Catalan club hian match 22 khelh tawh aṭanga point 59 hmuin table chung ber an luah mek a, an hnuai chiaha awm Real Madrid aiin point riat ngawtin an sang mek - champion an mitthla ṭan ang.

Pathianni zana La Liga inkhel ngaihven hlawh dangah Atletico Madrid chuan 1-0 in Athletic Bilbao an hneh a, Antoine Griezmann chuan inkhela goal awmchhun a khung.

A goal mawi

Nou Camp-a inkhelah, inkhel ṭantir aṭangin Barca-in Cadiz an nawr nghal a, Barca an chak dawn em? tih ai chuan, "Engtikah nge goal an khung ang?" tih chu zawhna a ni a, minute 43-naah a channa pek kan ni.

Spanish forward Ferran Torres chuan playe thiam bik a ni tih pholangin mawi zetin Cadiz penalty box-ah ball a lalut a, defender pathum a lam khum hnuah Lewy tan a siamsak.

Polish striker hian ṭha zetin lo tauh mah se, goal line-ah a ball tauh chu lo dan a ni a, a per lehlam chu Roberto ke bulah tak tlain, kum 31 mi midfielder hian an hmahruaina goal ni turin a lo khung.

Barcelona goal khung danah player-te an inmanzia hmuh turin a awm a, a tawpah Robert-a'n a hmawr bawk mah se 'team goal' tia chhal theih a ni - Catalan club an hmuhnawm takzet. Hetihrual hian Cadiz tana Roger-a goal khung pahnih chu pawm a ni lo, tih hriat telsak a ṭha.

A hming Lewy

Barcelona hian an duhtawk mai lo - first half hun pek belh a ni a, goal khung thiam bik Lewy inlar hun a ni. Sergi Roberto chuan ṭha zeta ball a lakluh hnuah, penalty box pawn chiaha ding Lewy a pe.

Polish striker hian khalh lut leh hretin, goal-ah mawi takin a khung a, 2-0 a ni der - hun tawp thlengin goal dang a lut tawh lo a, Barcelona-in Nou Camp-ah hnehna an chang a, champion an hnaih zel.

Thil mak danglam ve tak chu goal khungtu pahnih Roberto leh Lewy-ten goal an khung chiah khan, October 23-a 4-0 a Nou Camp-a Athletic Bilbao an hneh hnua player pahnihin Nou Camp-a league goal an khung lehna hmasa ber a ni.

Kum 34 mi Lewandowski hian La Liga match 19 aṭangin goal 15 a khung tling der a, 2009-10 season-a match 17-a goal 15 khungtu Cristiano Ronaldo tih lohah chuan kum 2001 hnua La Liga-a goal 15 khung tling tura match mamawh tlem ber a ni hial.

Atletico an chak

Season bul ṭan ṭha lo Atletico Madrid-in champion em beisei tawh lo mah se Champions League khelh loh erawh an duh lo, tih an thiltih hmangin an lantir a, 1-0 in hnehna an chang ve leh ta.

Atletico goal awmchhun hi Griezmann-a khung a ni a, kum 31 mi forward hian minute 73-naah khelmual lai aṭang deuthawin, ṭha zetin ball a khalh lut a, goal-ah a chantir.

Bilbao hian hun tawp thlengin a chhanna tur an nei tawh lo a, an league match hnuhnung parukah Atletico hi an tlawm tawh lo - vawi li an chak a, vawi hnih draw an nei. Diego Simeone-a team-te an insiamṭha zel.

Barca-a beisei a phak loh hnua Atletico-a kir Griezmann hming lam hmaih a thiang lo. French striker hian tun season inelna hrang hrangah match 31 khelin goal sarih a khung a, assist vawi kua a nei - ngai a awh chho leh ṭan mek.