Season tawpah ka la sawi chhuak ang - Mourinho

Jose Mourinho chuan Verona an hneh ṭuma fans ṭhenkhat chet dan chu a hrethiam thei lo a, hnehna an chang chunga auh el an tawk chu a pawm zam thei lo, tuna a sawi duh loh ṭhenkhat chu season tawpah a sawi dawn!

Pathianni zan Serie A inkhelah AS Roma hian an mikhual Verona chu 1-0 in an hneh, goal awmchhun hi Ola Solbakken-a'n chawlhlawk hma chiaha a khung a ni a, anmahni goal venghim zuiin point thum hmuh nan a tawk.

Roma coach Mourinho chuan, "Hnehna changtu zawng zawngte ka lawmpui, theihtawpa an beih hnua hnehna chang an ni. Player ṭhenkhat hliam vanga inlan thei lo an awm erawh a pawi ka ti.

"Theihtawpa kan bei chung pawha zahna kan dawng lo a nih chuan a dik lo, season laklawh lai a nih avangin interview ka la lo ang, a ṭul a nih chuan season hman zawh hunah kan la sawi chhuak ang chu," a ti.

Inkhel dangah Juventus chuan Moise Kean leh Angel di Maria te goal hmangin Spezia 2-0 in an hneh. Point 15 an paihsak Old Lady hian match 23 aṭangin point 32 an nei a, table-ah pasarihna dinhmun an luah mek.