Spurs-in Champions League khelh an tum

Leicester City laka 4-1 ngawta an mualpho hnu lawkin, Tottenham Hotspur chuan Champions League khelh an la tum ve reng tih an pholang a, an mikhual West Ham chu 2-0 in an hneh.

Tottenham Hotspur khelmualah first half chhungin goal lut lo mah se, second half-ah team ṭha zawk danglamna a lang a, minute 56-naah Emerson Royal chuan goal hmahruai khungin, bench aṭanga luhtir Son Heung-min chuan minute 72-naah a belhchhah ve leh bawk.

Emerson-a'n goal hmahruai a khung hnu lawkah hian, Hammers hian chhanlet nghalna remchang nei mah se, Jarrod Bowen-a chance neih duhawm tak chu Spurs goalkeeper Fraser Forster chuan ṭha zetin a lo dansak.

Spurs tan Son a inlar ve zui a, South Korean forward hian khelmual a luh aṭanga minute lina lekah an goal hnihna a khung zui - Antonio Conte team hi table-ah palina an ni zui a, an hnuai chiaha awm Newcastle United aiin point khatin an sang a, match khatin an khel tam thung.

Hammers erawh relegation zone tlansan theihna remchang an neih chu an chhawr lo a, Spurs lakah point hlawh chhuak se Bournemouth leh Everton tlanpel thei tur an ni - mahse, an chhawr tlat lo.

Spurs hi a mît (gallblader) zai avangin coach Antonio Conte chuan a ho thei lo a, assistant manager Cristian Stellini hoa inlanin point thum hlu tak an hlawh chhuak.

Hetihlai hian Spurs hian chanchin lawmawm lo an nei tel a, forward Son Heung-min chu West Ham nen an inkhelh laiin social media lamah chi inthliarna lam hawia beih a ni.

Spurs chuan an striker chunga thil thleng hi an dem thu tarlangin, thuneitute hnenah an thlen tawh thu an sawi a, social media company te chu online-a chi inthliarna lam hawi inhmuhsitna tibo tura hma la turin an ngen bawk.