Bayern = Dortmund = Berlin

Bundesliga-ah Union Berlin-in hmahruaina hun ṭha an bawhpelh a, Pathianni zan khan Schalke nen goal awm loin an inhnehtawk. Inkhel dangah Borussia Dortmund-in Hertha Berlin 4-1 in an sawp thung. Champion lai Bayern Munich, Borussia Dortmund leh Union Berlin ten point 43 vek an hmu.

Dortmund tan Chelsea laka goal ropui khungtu Karim Adeyemi a che ṭha chhunzawm a, Signal Iduna Park-ah mualneitu an che ṭha. Minute li hnuah Donyell Malen-a'n a khung lehnghal. Second half ṭan chiahah Lucas Tousart hmangin Hertha Berlin-in siphurh sut ṭhen mah se Marco Reus leh Julian Brandt ten an khung belh.

Edin Terzic hote hi chiang takin an chak a ni ringawt lo a, nomawi inchuhna kawngah Bayern an rum ṭhaih. Champion inelnaah hian Berlin club an tel a, Hertha Berlin ni loin Union Berlin zawk a ni.

Union Berlin hian an mual Alte Forsterei-ah inkhel thunun mah se Schalke lakah goal an khung thei lo. Urs Fischer hote hi an squad a chhah bik lo a, kar liam taa Europa League-a Ajax nena an inkhel chu tun ṭuma point an hlohna chhanah a ngaih theih. Berlin hi champion tur khawpin an lian tawk lo a nih pawhin club lian zawk Dortmund an che ṭha ve tlat a, Bayern tan ngaih ṭha taka awm theih a ni tawh lo ang.