Napoli beisei a sang

Serie A hmahruaitu Napoli-in zanin dar 1:30 hian Deutsche Bank Park-ah season liam ta Europa League champion Eintracht Frankfurt an tlawh dawn. Naples club hi league-a an chet dan thlirin a buk rit zawk an ni ang.

Gli Azzurri hi Serie A-ah ringawt an che ṭha lo a, Champions League-ah pawh beisei phak bakin an che ṭha. Italian club hian group match hmasa berah Liverpool 4-1 in an sawp a, an group-ah Reds bakah Rangers leh Ajax te an awm chungin vawi nga chak zawnin knockout stage an lut.

League-ah Victor Osimhen-a'n goal 18 a khung tawh a, Champions League-ah erawh Giovanni Simeone leh Giacomo Raspadori ten goal thum ve ve khungin Nigerian striker Osimhen (goal khat) aiin an khung tam zawk. Chumi awmzia chu kil tin aṭangin goal an khung thei tihna a ni. Georgian tlangval Khvicha Kvaratskhelia pawh hi en uluk a ṭul - kum 22 mi hi Europe club lianten an en thla mek.

Eintrancht Frankfurt tan UCL knockout stage thlen hi hlawhtlinna a ni thei a, league-ah pawh parukna an la ni mek. Eagles hian Tottenham, Sporting leh Marseille awmna group an patlang a, an striker Randal Kolo Muani hian tun season inelna hrang hrangah goal 15 an khung der tawh. German club hian ṭantu an nei ṭha a, kar tawp khan khan an mualah Werder Bremen 2-0 in an hneh. Napoli tan chetsual theihna a ni ang.