PSG tan a tawpah Messi a inlar

Hliam vangin Neymar lak chhuah a ngai a, forward ṭha mi Kylian Mbappe-a'n goal hnih khung mah se Paris Saint-Germain chak nan a tawk zo si lo, a tawpah Lionel Messi inlarin freekick a chhuih lut a, an mikhual Lille lakah Paris club hi 4-3 in an chak.

Tun hnaiah PSG an che fuh tawk lo, an match hnuhnung pathumah phei chuan an chak lo. An mangchhia aṭangin an harh ta a, player ṭha Neymar inhliam erawhin an rilru a tikhingbai deuh ngeiin a rinawm thung.

Nikum August thla khan Lille mualah PSG hi 7-1 in an chak, tun ṭuma an inkhelhna hi Paris khawpui a ni a, a tir lamah Neymar-a'n Mbappe a siamsak bakah Brazilian forward hian khung belhin 2-0 in hma an hruai.

Christophe Galtier-a naute tan hna harsa tur a awm tawh loa ngaih a ni, engzat nge an khung belh ang tih chu zawhna a ni zawk. Mahse, mikhual Lille lamin mak tak maiin Bafode Diakite leh Jonathan David te hmangin si phurh an sut zo.

Goal hnih an khung a ni satliah lo - Lille hian Jonathan Bamba hmangin 3-2 in hma an hruai let daih. Hliam vangin Neymar zawn chhuah a ngai a, goal mamawh huna an player pawimawh an zawn chhuak hian midang rilru a nghawng mai thei.

Mahse, player huaisen leh ṭhahnem ngai Mbappe-a'n minute 87-naah si purh sutna a tlawh goal pawp. PSG an phur chhunzawm a, midfielder Marco Verratti hoin ball an inpe mawi thei viau a, a hmawr erawh an bawk chhunzawm hlei thei lo.

Counter attack aṭangin PSG lamin an vaw let, ball changtu Messi chuan a hlauhawm laiah a lalut a, yard 22-a hlaah an lo titlu - box chhung a thlen hmaa tihtluk kha thutlukna finthlak leh tih awm tak ni pawhin a lang.

Amaherawhchu, freekick hi Messi hlauhawmna a ni. Argentina captain hian a freekick hlawhchhuah hi goal kilah tak a thlawh lut a, goalkeeper Lucas Chevalier-a'n lo zuan mah se a dang phak lo, anmahni mualah PSG an chak.

PSG coach Christophe Galtier chuan, "Goal hniha hma kan hruai hnuah a hnufual zawkah kan ṭang leh a, chumi hnua kan thawh leh dan khan min tilawm," tiin a naute khelh danah a lawm, chutihrualin an tlarhnung an remphui lo a nih chuan buaina an la nei leh dawn.

Champions League last 16-ah Bayern Munich 1-0 in an ngam lo a, last 16 second leg hi March 8 hian Allianz Arena-ah an khel dawn. German champion lakah hian kerek hliam Neymar a dam hman dawn em, tih a chiang rih lo.

UCL khelh hmain PSG hian hna hautak thawh tur an nei dawn. February 26 hian Ligue 1 lamah anmahni elphak ber, point nga chauha thlautu Marseille chu khualmualah an lenchilh dawn a ni.