All-Star record siamtu Jayson Tatum

Jayson Tatum chuan All-Star Game record a siam, nimin zing khan Team Giannis tana khelin point 55 a nei a, hei hi NBA All-Star Game bika player malin point a neih hnem ber a ni hial.

Player ṭha leh hmuh-nawm rual inkhelah Team Giannis chuan Team LeBron chu 184-175 in an hneh. An chak theih nana thawhhlawk tak Tatum hian kum 2017-a Anthony Davis-a record lo siam tawh point 52 chu a rawn khum.

Most Valuable Player (MVP) atana thlan zui tak Tatum chuan, "Player ropui leh thiam rual kiangah ka khel a, chu chauh pawh chu chawimawina a nih tawh laiin record ka siam thei hi ka tan a hlu, hei aia ropui hi a awm thei tawh chuang lo ang.

"Record hi rei tak awm se ka duh, chu chu ka duhthusam pawh a ni. Mahse, nakkum lekah pawh mi tu emaw chuan a rawn khum nghal thei tih ka hria, tun atan chuan hlim taka awm phawt mai hi a fuh," a ti.

Team LeBron tan hian Boston Celtics lama Tatum-a khelhpui Jaylen Brown chuan point 35 a nei thung a, a nei hnem ber. Mahse, a team chakpui nan a tawk zo lo a, an captain LeBron James chu hliam vangin an chân bawk.

Los Angeles Lakers star James hi a vawi 19 nan NBA All Star-ah a tel a, record nei ṭha ber Kareem Abdul-Jabbar a nih rual. Mellung pawimawh a phun zan hian a kut zungṭang hliam vangin second half a khel chhunzawm ve thei lo.