Nomawi 16 chawi tlingtu Medvedev

Daniil Medvedev chuan Pathianni zana khelh zawh tak Rotterdam Open final-ah Jannik Sinner a hneh a, world number 1 hlui hian tennis a khelh chhungin nomawi 16 a chawi tling ta chiah bawk.

Kum 27 mi Medvedev hian Sinner hi 5-7, 6-2, 6-2 in a hneh, nikum October thla hnua nomawi a chawi lehna hmasa ber a ni a, a tan chuan hliam leh harsatna dang a paltlang hnua a champion lehna hmasa a nih avangin a hlu zual ang.

US Open 2021 champion Medvedev chuan, "Set hmasa ber hloh hi chuan thil a harsa tawh ṭhin. Jannik a khel ṭha khawp mai, taksa chauh ni loin rilru lam thlengin paukhauh a ngai," tiin inkhel hautak a nih thu a sawi.

Medvedev hian world number 1 dinhmun hial pawh a lo luah tawh ṭhin, tunah erawh world number 11 a ni - tun kara world ranking chhuak tharah chuan a sang zual 10 zingah a tel phak leh tawh ang.