Tlai dar 2:00-ah Kashmir Vs Aizawl FC

Aizawl FC-in Kashmir an tlawh hmasak ṭumin vur a tlak nasat avangin an inkhel thei lo a, inkhel loin Mizoramah an rawn kir. Tun ṭumah erawh Mizo club leh Real Kashmir te an inkhel tak tak tawh dawn a, vawiin tlai dar 2:00 hian TRC Polo Synthetic Turf Ground-ah an inkhel ang.

Mizo club hian match hnuhnung pahnihah an chak lo ve ve a, RoundGlass Punjab an hneh loh hnuah Trau an hneh loh leh avangin paruknaah an la awm chhunzawm zel. Coach Caetano Pinho chuan, "Season tawpnaah paruknaah kan awm theih ka ring a, chu aia sang pawh chu a ni thei," tiin Vanglaini a lo hrilh tawh.

Aizawl FC coach Pinho thusawi dikna a lang zel a, parukna chinah an la awm zel. Amaherawhchu match zawna an chak loh avangin pasarihna Real Kashmir nen point 23 ve ve an hmu mek - Mizo club hi an goal difference a ṭhat zawk vangin a chung zawkah an awm.

RG Stadium-a an inkhel ṭum khan goal awm loin Aizawl FC leh Real Kashmir te hi an inhnehtawk. Mizo club hian January transfer-ah Ivan Veras an lalut a, Belarusian forward hian goal khung nghal mah se danglamna thlen thei player niin a lang lo.

Aizawl FC-in Real Kashmir laka result ṭha nei turin Mizo player-te an che ṭhat a ṭul leh dawn. Kashmir club hian match hnuhnung pathumah chak loh an nei lo a, Lunglei tlangval Lalnuntluanga Bawitlung a che ṭha zel a, vawiin tlaiah pawh a che ṭha ang.