Rashford-a'n a hna ngai a chhunzawm

World Cup 2022 zawh hnua harhtharna chang Marcus Rashford-a'n goal khung a chhunzawm zel. Pathianni zan khan Manchester United-in Leicester City 3-0 in an hneh a, Rashford-a'n goal hnih a khung. English forward hian Qatar aṭanga a haw hnuah inelna hrang hrangah goal 16 a khung tawh a ni.

Old Trafford-a inkhelah hian Man United hi chiang taka chak angin lang mah se talbuai lai an la nei a, David de Gea zarah buaina lian tham an pumpelh. Rashford bakah hian substitute Jadon Sancho-a'n goal a khung bawk.

De Gea a rintlak

Man United-in bul an ṭan ṭha a, inkhel pawh an thunun zawk. Mahse, Foxes-in chance ṭha an nei hmasa thung. Harvey Barnes-a'n thui tak a khalh hnuah Kelechi Iheanacho nen wall pass hmangin United tlarhnung an ṭhiat a, English winger hian goal-ah ṭha takin pet mah se De Gea-a'n a dang.

Mualneitu an talbuai zui a, Foxes right back Timothy Castagne cross chu Iheanacho-a'n goal-ah ṭha takin a tauh nachungin mak takin De Gea-a'n a kut khing khatin a dang hman. Mikhual team hian chance tenau dang pawh an nei a, United tan ngaihṭhatna chi a ni ta lo.

A hming chu Rashford

Minute 25-naah captain Bruno Fernandes-a'n fing takin ball a pe lut a, Foxes offside trap bumtu Rashford-a'n um lutin chiang takin a pet goal. English forward hian vengtu nei lo Alejandro Garnacho pawh a hmu reng a, mahse a inringtawk tlat a, a tisual lo bawk - ball-in goal net a tawn puar.

Second half-ah United-in goal an khung hma, minute 56-naah Fred-a throught ball class (Fred-a ke aṭanga chhuak maw!) chu Rashford-a'n um lutin keeper Danny Ward kap karah a khung. Assistant referee-in offside phar mah se VAR hmanga enlet hnuah goal-ah an pawm.

Minute nga hnuah Rashford, Sancho leh Fernandes ten passing mawi an chhawp chhuak a, Foxes defender-ten dan ngaihna an hre lo. English winger Sancho-a'n a hmawr bawk a, 3-0 in inkhel a tawp.

Ten Hag-a hnathawh

Season liam ta khan Man United hi parukna an ni chauh a, tun season-ah erawh pathumnaah an awm mek. Erik Ten Hag-a'n hna ṭha tak a thawk tih a lang a, Dutch manager hian a player lakluhte a hmang ṭangkai hle.

Wout Weghorst-a'n goal khung a harsat a, Foxes lakah pawh a hlah nual. Mahse, Weghorst hi a thawkrim thung a, kum 30 mi hian Old Trafford a pan hnuah player ṭangkai a ni pha.

Tlarhnungah Ajax aṭanga Ten Hag zawmtu Lisandro Martinez a pawimawh ṭhin a, Sancho pawhin harhtharna a chang chho mek. Dutch manager pawhin player-te hna a pe ṭha a, Luke Shaw-a'n goal a nawrpui laiin Fred-a'n a hmun ruak a hnawhsak.

Tlarhma lama player Weghorst, Sancho leh Rashford ten awmna nghet an nei lo a; winger, no. 10 leh no. 9 an chelh kual a, Foxes tlarhnungin harsatna an tawk pawh a mak hran lo.

Manchester United manager Erik ten Hag chuan, "Kan vannei a, De Gea zarah goal kan chhuah lo. Kan khelh dan a dik tawk lo a ni. Halftime-ah 1-0 a ni a, midfield leh defence hnung a thawl tih kan hmu a, chak dan tur kan hria. Bruno a che ṭha a, Rashy pawh a finishing a ṭha. Kan player zawng zawng inkhel turin an inpeih a ngai a, kan khelh dan an bel a ngai bawk," tiin a sawi.

Red Devils hian kartawpah Newcastle United nen League Cup final an khel dawn a, Dutch manager hnuaia nomawi hmasa ber an chawi thei ang. Amaherawhchu Wembley Stadium an pan hmain Old Trafford-ah Barcelona nen February 23, Ningani zan hian an inkhel phawt dawn - hmabak a hautak hle.