England pan tur Magalhaes?

Season tawp hmain nipui transfer a in ṭan a, Lille defender Gabriel Magalhaes hi ngaihven hlawh zinga mi a ni. Covid-19 buaina awm lo ta se Brazilian defender hian Everton a pan ngei a rinawm.

Amaherawhchu ke vei lama pet defender Magalhaes lak tum hian Manchester United pawh sawi rik an ni a, Ole Gunnar Solskjaer-a'n ke dinglama pet Harry Maguire leh Victor Lindelof te defence laiah chhawr rim mah se inkawp fuh tawk lohna a awm avangin Brazilian defender hming an sawi ri hi a mak lo.

United nen pawha sawi zawm Nathan Ake-a'n Manchester City a zawm tawh a, Gabriel Magalhaes hi kum 22 mi chauh a nih bakah pound maktaduai 30 hnuai lam tura ngaih a nih avangin English club dang Arsenal leh Chelsea te nen pawh an sawi zawm. English club bakah hian Napoli leh PSG te hming sawi rik a nih bawk avangin Brazilian defender chan a harsa dawn. Lille hian Ajax aṭangin defender Sven Botman an lalut tawh a, Magalhaes thlakna tura ngaih a ni.