Pep leh Haaland ten UCL nomawi an thlir

Zanin dar 1:30 hian Manchester City-in Champions League last 16-a RB Leipzig hmachhawn turin Red Bull Arena an tlawh dawn a, German club hi Man City tan harsa turin lang lo mah se group stage-ah Real Madrid an hneh thei tih hriat a ṭha. Marco Rose-a hote hian kartawp khan Wolfsburg 3-0 in an sawp bawk a, City mikhual turin an inpeih.

Pep leh UCL

Manchester City-in Pep Guardiola hnuaiah UCL season ruk an khel tawh a, an thlen san ber chu final a ni. Citizens-in UCL nomawi an la chawi ngai lo a, Barcelona-a vawi hnih champion tawh Pep-a meuh pawh season ruk chhung chu a hlawhchham tawh.

Spanish manager hian UCL champion ngei tumin no. 9 ṭha mi Erling Haaland an lalut a, Norwegian striker-in goal khung tam mah se Premier League-ah pahnihnaah an awm mek. Champions League-ah eng nge a an dawn tih chu hunin a hril ang.

Pep hian UCL nomawi a chawi hnuhnun ber chu kum 2011 daih tawh kha a ni a, Manchester United hnehin an champion. Khami ṭuma tlarhma lama an player-te chu Lionel Messi, Pedro leh David Villa te an ni a, no. 9 tia chhal theih tur an awm lo.

Chutihrualin Pep-a'n UCL nomawi a chawi hmasak berah kha chuan Samuel Eto'o leh Thierry Henry te a kawl thung. Spanish manager hian Barcelona aṭangin Bayern Munich a pan a, German club hi semifinal ṭum thum luhpui mah se Spanish club Real Madrid, Barcelona leh Atletico Madrid lakah an chak lo.

Bavarians-ah hian Pep-a'n khawvel striker ṭha ber zinga mi Robert Lewandowski a nei a, a hlawhtlinpui chuang lo. Man City-in Sergio Aguero an kawl ṭhin a, chutihrualin striker palian rintlak erawh an nei ngai lo. Barcelona leh Bayern Munich ang thoin Pep hian City a enkawl hnuah pawh league a thunun thei a, mahse UCL nomawi chawi a harsat tlat.

Mamaawh chhanna Haaland

Khelh dan phung nghet bik nei Pep Guardiola meuh pawhin a naute a khelhtir dan a ring zo ta lo a, khelh dan thar duangin striker ṭha a melh. Season liam ta khan nipui bazarah Harry Kane lak tumin theihtawp an chhuah a, Tottenham Hotspur neitu Daniel Levy-a'n a bengkhawn loh avangin an la thei ta lo.

Man City hian UCL-ah champion zui ta Real Madrid chu semifinal-ah an hneh lo a, Premier League-ah champion mah se Pep-a'n a squad a duhkhawp lo tih a chiang. Spanish manager hian Gabriel Jesus, Oleksandr Zinchenko leh Raheem Sterling te chu a chhuahtir a, Fernandinho erawhin contract a pawhsei lo.

City hian Kalvin Phillips, Manuel Akanji leh Sergio Gomez te lalut bawk mah se an lakluh zinga langsar lawrlak chu Erling Haaland a ni. Norwegian striker hian UCL-ah goal nga a khung tawh a, Premier League-ah phei chuan match 23 aṭangin goal 26 a khung.

Haaland-a'n ṭha lehzuala a khelh theih nan Pep-a'n an khelh dan a thlak leh hret a, wing back ṭha Joao Cancelo meuh pawh January transfer-ah loan hmangin Bayern Munich-ah a chhuahtir hmak. Spanish manager-in thutlukna danglam tak a siam chhan hi Haaland-a chunga rinna a nghah vang a ni a, Messi chunga rinna nghat ṭhin Pep hian thutlukna dik a siam ang em tih chu season tawpah a hriat ang.

Premier League bik anga chhut chuan Pep-a'n thutlukna a siam fuh lo. City-in an hmelma Arsenal lakah player ṭha Jesus leh Zinchenko an hralh a, Mikel Arteta-a'n thiam taka a hman bawk avangin Pep-a hote hi nomawi chan thei dinhmunah an awm mek.

Engtin zel?

Season liam ta khan group stage-ah Man City leh RB Leipzig te hi an awm ho a, Eithad Stadium-ah Pep-a hote 6-3 in a chak. Chutihrualin Leipzig tan Christopher Nkunku-a'n hattrick a siam a, French forward hi hliam vanga a chawlh hnuah match hnuhnung berah khan bench aṭangin a lut leh tawh.

Hei chauh hi a ni lo, zanina an inkhelhna tur Red Bull Arena-ah Leipzig hi 2-1 in a chak ve thung a, City hi knockout stage an luh tawh vang ni bawk mah se German club hi vanduaihna theihna an ni tih chu a chiang hle. Leizpig coach Marco Rose chuan, "City hian world class player an ngah a, Gladbach ka enkawl lai khan ka hmachhawn tawh. Mi ṭhenkhat rin dan loin thil kan thlentir thei a, chona kan hmachhawn turin kan inpeih e," tiin a sawi.

City boss Pep pawhin, "German football hi ka dah sang hle. RB Leizpig hi club naupang ni mah se hmachhawp ṭha tak nei leh kalphung bik nei an ni a, an coach pawhin tawnhriat an nei ṭha," tiin a sawi ve bawk.