Zaninah Mayor's Cup entu an ṭhahnem dawn

Aizawl Day 2023 puala buatsaih Mayors Cup - Inter Ward Football Tournament semifinal hnuhnung zawk chu zanin dar 7:00 hian RG Stadium-ah Ward No. XVIII leh Ward No. XII ten an khel ang.

RG Stadium hi Ward No. XVIII chhunga awm a ni a, MPL club FC Venghnuai an nei. Mayor's Cup-ah pawh hian Venghnuai coach Lalrindika Ralte-in a ho a, champion rinkai zinga mi an ni.

Ward No. XVIII-ah hian veng pariat Salem Veng, Venghnuai, Model Veng, Thakthing, ITI Veng, Dam Veng, Mission Veng leh Tuikhuahtlang te an awm a, an intel khawm ṭhat chuan entu ṭha tur an ni.

An khingpui tur Ward No. XII erawh veng pathum Tuikual North, Tuikual South leh Dinthar te chauh ni mah se dah hniam theih an ni lo. Dinthar hi veng leh veng inelnaa sulhnu nei ṭha ber zinga mi an ni a, MPL hmasa bera champion thei veng an ni.

Samuel Laltlanthanga'n Ward No. XII-ah hmun pawimawh a la chang a, veteran striker hi MPL hnuhnung bera Chawnpui FC champion puitu zingah pawh a tel. Samuel bakah hian tun dinhmuna Mizo striker ṭha zinga mi Tuikual North tlangval Lalremruata pawh an kawl a, Ward No. XVIII tlarhnung tan buaipui tham an ni ang.