Real Kashmir-in Aizawl FC an lehthal

Nimin I League inkhelah Aizawl FC-in goal khung hmasa mah se mualneitu Real Kashmir-in an lehthal. Kashmir club hian 2-1 a hnehna an chan avangin Mizo club zuan khumin paruknaah an awm a, Caetano Pinho hote erawh pasarihnaah an tla thla thung.

TRC Polo Synthetic Turf Ground-a inkhelah first half-ah goal a lut lo. Aizawl FC-in minute 75-naah goal a khung a, MFA Inter Village 2022 best player Lalramsanga'n box pawna Lalchhanhima Sailo ball pek chu ṭha zetin a pet goal.

Mizo club tan point thum hlawh chhuak turin minute 15 dang chauh tlarhnung tihphui a ngai a, mahse keeper Lalmuansanga a chesual. Mizo goalkepeeper Muansanga hian ball a thlauh a, captain Lalchhawnkima aia Jestin George a chet ran bawk avangin Real Kashmir-in si phurh an sut.

Aizawl FC tlarhnung a phui tawk lo a, minute ruk hnuah Real Kashmir midfielder Samuel Kynshi chuan box pawnah hun thawl neiin chakna goal mawi zetin a khung. Shillong Lajong aṭanga inzir chhuak Kynshi hi man of the match-a thlan a ni.