Europa League - Eng nge beisei tur la awm?

Covid-19 vangin Europa League khelh dan kalphung a danglam dawn a, quarterfinal aṭangin Germany khaw pali Cologne, Dusseldorf, Duisburg leh Gelsenkirchen-ah te khelh a ni dawn.

August 5, Nilaini zan aṭangin Europa League khelh ṭan a ni leh tawh dawn a, quarterfinal khelh hmain match pariat a la awm. Inter Milan Vs Getafe leh Sevilla vs Roma ten Covid-19 vangin first leg an khel hman lo a, chuvangin round of 16 hi single leg-in Germany-ah an khel ṭan nghal ang. Inkhel dang paruk erawh ruahman dan pangngaiin a kal dawn.

Sevilla vs Roma : Sevilla hi La Liga-ah palina an ni a, Covid-19 hnuah match 11 chhung hneh loh an tawng lo. Julen Lopetegui hote hian pathumna nih beisei mah se goal difference vangin Atletico Madrid hnuaiah an awm. Roma hi Serie A-ah panganaah an awm a, season khar nan champion Juventus 3-1 a an hneh avangin sawi nep theih an ni lo ang. Sevilla leh Roma te hi champion rinkai zinga mi an la ni.

Inter Vs Getafe : Inter Milan hian Serie A-ah pahnihna niin season an khar a, Antonio Conte hote an nih avangin champion tur pawhin rinkai an ni phak. Nerazzurri buaina erawh Alexis Sanchez a ni a, Manchester United-in loan hmanga an hawhtir hi an la nghet duh lo a nih chuan khelhtir an phal kher lo ang. Getafe erawh Covid-19 hnuah an tlahniam, La Liga-a palina ni reng kha pariatna niin season an khar.

United Vs LASK : Manchester United-in Bruno Fernandes an neih hnuah nasa takin hma an sawn a, season tawpah pathumna hial an ni pha. Ole Gunnar Solskjaer-a hote hi first leg-ah 5-0 in an chak tawh a, second leg hi hahdam nan an hmang thei ang. LASK tan erawh Old Trafford-a inkhelh ve hrim hrim bak tih tur a awm tawh lo.

Copenhagen Vs Basaksehir : Danish Super League-ah kum 2019 khan Copenhagen an champion a, kuminah erawh pahnihna niin season an khar. Istanbul Basaksehir erawh Covid-19 hmain pahnihna an ni a, hripui len hnuah an champion. First leg-ah Istanbul hi 1-0  in an chak a, Turkish club hi chak zawk tura beisei an ni.

Wolves Vs Olympiakos: Wolverhampton Wanderers hi Premier League-ah pasarihna an ni a, season thara Europe-a khel turin Europa League-a champion a ngai. An khingpui tur Olympiakos hi Greek champion an ni a, first leg-ah 1-1 a an inhnehtawk avangin second leg a hmuhnawm ang.

Leverkusen Vs Rangers : Bayer Leverkusen hi Bundesliga-ah pangana ni mah se Scottish Premiership-a pahnihna Rangers hi first leg-ah 3-1 in an hneh. German club hi champion tur thleng pawha rinkai an ni pha.

Shakhtar Vs Wolsfburg: Ukrainian Premier League champion Shakhtar-in first leg-ah 2-1 in hnehna an chang tawh a, Wolfsburg hi Bundesliga club ni mah se dah san an harsa. 

Basel Vs Frankfurt : Swiss Super League-ah Basel pathumna an ni mek a, pahnihna an la ni thei. Europa League-ah erawh first leg-ah 3-0 in an chak a, Eintracht Frankfurt hneh turin an dinhmun a ṭha hle.