Leeds United boss thar Javi Gracia

Premier League club Leeds United chuan coach Jesse Marsch an ban hnuah a hmun ruak luah turin Watford boss hlui Javi Gracia an lalut dawn a, he thuziak i chhiar meuh chuan Gracia hi Leeds coach a ni tawh hial ang - Elland Road a thleng tawh.

Leeds hian February 6 khan coach Marsch chu a hna aṭangin an chawlhtir a, club neitu Andrea Radrizzani chuan Marsch thlaktu tur hi an lakluh thuai tur thu sawi mah se, beisei angin a tira an dawrteah an hlawhtling lo.

Premier League table-a 19-na ni mek Leeds hian Rayo Vallecano coach Andoni Iraola leh Feyenoord boss Arne Slot te dawr mah se coach pahnih hian English club hi an hnar a, Ajax coach hlui Alfred Schreuder hming lam ri mah se fan-ten an duh loh avangin an dawr chhunzawm lo a, Leeds-a Marcelo Bielsa assistant ṭhin Carlos Corberan chuan West Brom-ah contract thar a ziak bawk.

Hetiang boruak karah hian Premier League-a tawnhriat nei tawh Gracia lam an hawi a, kum 52 mi coach hian Elland Road-ah engtianga rei cham turin nge contract a ziah dawn, he thu buatsaih lai hian hriat theih a ni lo.

Gracia hian Watford chu January 2018 - September 2019 inkar kha enkawlin, kum 2019 khan FA Cup final hial a hruai thleng a, kum 35 hnua FA Cup final an khelh hmasak ber niin, Premier League-ah 11-na a nihpui bawk.

Mahse, September 2019-ah khan season bul an ṭan ṭhat tawk loh avangin a hna aṭanga ban a ni a, Watford hi Premier League match 56-ah vawi 18 hnehna chanpuiin, match tina point 1.18 zel hlawh chhuak ang a ni phak.

Watford-in an ban hnuah Valencia leh Qatari club ṭha Al Sadd a enkawl zui a, Spanish club Valencia-ah match 38 aṭanga vawi 11 chiah a chakpui hnuin ban a ni a, Al Sadd erawh season hmasa khan Qatar Stars League-ah a champion pui thung.

Leeds-ah pawh Gracia hmabak a awlsam dawn lo - an league match hnuhnung berah 1-0 in Everton an hneh lo a, target-ah shot an nei miah lo. Premier League table-ah 19-na ni mekin, Inrinni zan dar 8:30 hian table mawngphah luahtu Southampton an mikhual ang.