Hmasawn duh vangin Gunners ka pan - Jorginho

Italian midfielder Jorginho chuan thlasik bazarah Chelsea aṭangin Arsenal a pan a, a man hi pound maktaduai 12 chauh a nih bawk avangin mak tih a hlawh hle.

Jorginho chuan, "Chelsea hotute nen kan inbia a, an hmalam hun atan min telh lo. A chang chuan club hmachhawpa tel loh hi kan pawm thiam a ṭul a, engkim hian tawp hun a nei a ni.

"Chutihrualin hmasawn zel ka duh a, Arsenal hmachhawp nen hian kan inkawp rem thlap. Darkar 48 chhungin engkim kan tifel," tiin a sawi.

Arsenal-in Jorginho an neih hnuah result ṭha neih an harsat a, amaherawhchu kartawpah erawh a pawimawhna a lang. Gunners-in Aston Villa an hneh theih nan box pawn aṭanga a ball pet ṭha zet chuan ban a per hnuah keeper Emiliano Martínez a per a, goal-ah a lut.

Jorginho zarah Gunners-in point thum an hmu a, Manchester City aia match khata khel tlemin point hnihin an hmu hnem zawk. Mikel Arteta hote hian February 25, Inrinni zan hian Leicester City an hmachhawn ang.