Inter Milan mualah Porto an lut dawn
San Siro khelmualah hian European football hmuhnawm leh ropui tak tak khelh a lo ni tawh ṭhin, a stadium ringawt pawh hian huhang a ngah. Zanin dar 1:30 hian Inter Milan chuan Porto an lo mikhual ang.
Italy rama stadium hmingthang tak hi tun hnaiah a khat ṭha tawk lo. Khelmual inṭawmtu AC Milan leh Inter Milan ten vanglai an hman loh vang pawh a ni mai thei - Champions League last 16 enna tur ticket erawh an hralh zo vek, mipui 70,000 chuang an pungkhawm dawn.
Inter hi group C-ah pahnihna ni chunga tlang an ni, an chungah Bayern Munich an awm - pahnihna ni mah se Barcelona nek chhuaktu an ni tih erawh hriat a ṭha. Porto erawh group B lamah Atletico Madrid chunga awmin hmahruaitu an ni thung.
Lukaku awmna
Romelu Lukaku-a'n ropui takin Serie A nomawi a chawi a, chumi hnuah Chelsea a zawm. Blues tan beisei a phak loh avangin a ropuina Inter Milan bawk a zawm, mah se tun thleng chuan a rin leh duh angin thil a la thleng lo.
Hliamin a tibuai a, a inkhelh chhunah a khel ṭha tawk lo bawk. A zawna match nga chhung tlawm nei lo Nerazzurri tan zaninah Lukaku a chetṭhat a pawimawh dawn, an league match hnuhnung berah penalty aṭanga goal a khung avangin inrintawkna erawh a nei ang.
Inter Milan manager Simone Inzaghi chuan, "Season hmasa khan Lukaku hian London khawpuiah buaina a nei, kan hnenah kan hruai kir a, mahse vanduai thlak takin thla li chhung chu hliam vangin a inkhel thei lo.
"Tunah chuan zawi muangin hma a sawn, training leh match a khelh apiangin hma a sawn tih ka hmu. A bul ṭantu zinga kan telh tawh chuan kan ringtawk a, a ṭha tawk leh tawh tihna a ni," a ti, zaninah pawh a bul ṭantu zingah a tel ngei a rinawm.
Porto an damlo
Porto head coach Sergio Conceicao chuan Inter Milan an hmachhawn hunah an player ṭha ṭhenkhat chu hliam vangin an chhawr thei dawn lo tih a sawi a, an tan harsatna thlen tham a nih thu a sawi bawk.
Coach hian a chhawr theih loh tur hming a tarlang vek lo, mahse forward Evanilson leh midfielder Otavio te chu khel thei lo tur chiang zinga mi an ni. Conceicao chuan, "A nihna tak sawi chuan kan player chhawr theih loh turte hi an hmun ruak hnawh khah theih a ni lo.
"Harsatna chu kan tawk ngei mai, amaherawhchu chak lo turin San Siro kan pan dawn bik lo. Hnehna chan tumin Italy kan pan a, chuvangin theihtawp kan chhuah ang," tiin a sawi a, khualmualah hnehna hlado chham ngei an tum.
Porto hian European footbal inelna bika Italian team an hmachhawn hnuhnung pasarihah vawi khat chiah chak loh an nei, vawi li chakin ṭum hnih chu an inhnehtawk. Portuguese team hi an ṭhat dan berin an thawk chhuak lo a nih pawhin inrintawkna chu an nei ang.
Champions League Last 16
February 23, Ningani Zan
RB Leipzig 01:30 AM Manchester City
Inter Milan 01:30 AM Porto