Liverpool an hralh leh dawn lo

Premier League club Liverpool neitu John Henry chuan Merseyside club hralh an tum loh thu a sawi a, hetihrual hian Reds-a share lei duh an awm a nih erawh chuan an inhawng thung.

John Henry leh a ṭhianten an din, Liverpool neitu Fenway Sports Group hian kum 2010 khan pound maktaduai 300-in Liverpool hi an lei a, November, 2022 khan thuchhuah siamin, club-a share lei duh tana an inhawn thu an sawi.

FSG thuchhuah avang hian Liverpool hian neitu thar an nei dawn nia rinna a lian hman a, a hnu lawkah FSG chairman Tom Werner chuan Reds hralh an tum thu leh, hmanhmawh taka kalpui erawh an tum loh thu a sawi bawk.

Mahse, tuna thuthar berah chuan FSG-in Liverpool an hralh dawn lo a, share nei duh tan erawh neih theih a ni dawn. Henry chuan, "Liverpool kan hralh dawn lo a, sum peipun nana share lei duh an awm chuan kan inhawng thung.

"Liverpool-ah hian share nei thar chu an awm ngei dawn a, mahse, club hralh erawh a ni dawn lo," a ti a, November khan Reds-a share nei duh an awm chungchang buaipui turin investment bank pahnih Morgan Stanley leh Goldman Sachs chu an lo ruat tawh.

Henry chuan, "Liverpool chungchanga thil sawi tam tak awm hi ka hria a, mahse, tunah chuan thil kan la kalpui mek chauh a ni. England-ah hian kan awm reng kher lo mai thei a, chuvang chuan Liverpool kan zuar tihna erawh a ni lo," a ti a, "Kum 20 chuang chhungin thil kan hralh tawh inhria em ni?" a ti bawk.

Liverpool-a neitu zingah American basketball star LeBron James a tel a, kum 2011 khan 2% stake chu £4.7mtd-in a lei a, tuna a hlut zawng chu £38.3mtd vel a ni tawh, niin an sawi.

FSG-a share nei bawk Lebron James bakah hian RedBird Capital Partners chuan March 2021 khan FSG-ah stake an lei bawk a, £533mtd ngawt an inseng.