Cremonese an la chak ve miah lo

Serie A season kal laiah match 23 an khel tawh a, a chanve aia tam an khel tawh - Cremonese chuan chak ni hmel an la hmu ve miah lo! Point kua chauh neiin table mawngphah luahtu an ni mek zel.

Thawhṭanni zan khan Cremonese hian Torino an tlawh a, 2-2 in an inhnehtawk. Chawlhlawk hma deuhin Torino lamin Antonio Sanabria penalty chhuih luh hmangin goal hmahruai an khung.

Second half-ah Cremo-nese lamin Frank Tsadjout hmangin an sut a, a hnuah Emmanuele Valeri hmangin an khung belh, a vawi khat nan an chak dawn emaw ti hman mah se mualneitu lamin Wilfried Singo hmangin an sut leh a ni.

Cremonese hi tla ngei tura ngaih an ni tawh a, a him china awm Spezia an phak lohna chu point 10 lai a ni. Serie A bikah hian season tluana chak ni hmel hmu miah lo an la awm ngai lo, record thar duhawm lo siam thei dinhmunah Cremonese an ding mek.