Vikings leh LB an chak

Mizoram Super League team hlun berte zinga mi Tuikual South tan season duhawm a ni thei rih lo. Phengphehlep hi Thawhṭan zan khan Chanmari Vikings lakah 90-81 in an chak lo.

R. Dengṭhuama Indoor Stadium, Mualpuia inkhelah Chanmari Vikings tan Moses Zoremmawia chuan a thiam thil lantirin point 30 a nei a, mimala thawh hlawk fal ber a ni, a tawnhriat neih an chhawr ṭangkai hle.

Tuikual South hi an legend F. Zodinthara hoin an inlan a, Dennis Lalmuanpuia (20 points) leh Lalnunsanga (15) te cha ṭha thawhkhat mah se team chakpui nan a tawk zo lo, semifinal khel tur chuan insiamṭhat an mamawh hle.

Team thar pahnih inkhelah Bungkawn LB Associates chuan Champhai District BBA chu 78-56 in an hneh thung a, match li an khelh tawhah LB hian a vawi hnih nan hnehna an chang a, semifinal an beisei ngam ang.

LB an chak theih nan hian Lalnunpuia Renthlei chuan point 25 a nei a, tualchhung player dang Lalremruata chuan point 12 a nei bawk - player dang zingah point nei hnem fal awm lo mah se, team thawhhona ṭha chu an chak chhan a ni.

Aizawl pawn aṭanga MSL khel thei hmasa ber Champhai tan a la harsa, state pawn aṭanga an chah luh Agu Stanley-a'n point 22 a nei a, team dang player chah luhte nena khaikhin chuan a che na tawk lo, a ṭhiante zingah amah thlawptu an ṭha tawk lo bawk.

Zanin hian a hmun ngaiah inkhel pahnih a awm leh dawn. Champion lai leh tun season league hmahruai mektu ni bawk Zarkawt BCA chuan Khatla South Barons an hmachhawn ang.

Vawi hnih champion tawh Khatla TBL leh Champhai hnehtu Bungkawn LB te an inkhel dawn bawk. Tun season MSL-ah team tin an ṭha, point neih an awlsam hlawm avangin inkhel a hmuhnawm ṭhin hle.