Indian Super League Playoff - hmun ruak pakhat a la awm!

India rama football league sang ber Indian Super League hmawr bawk a hnai ṭan - Mumbai City FC chuan league match 20 khel zo tawhin, league round hmahruaitu an ni chiang a, semifinal an lut tawh.

Mumbai tih loh zawng, club dang 10-in league match khat ṭheuh khelh tur an la nei a, heng zingah hian club pali, Hyderabad FC, ATK Mohun Bagan, Bengaluru leh Kerala Blasters ten playoff an khel dawn tih a chiang tawh bawk.

Tun season aṭangin ISL-ah team parukin playoff an khel tawh dawn a, hmun ruak pakhat a la awm tihna a ni - Odisha leh FC Goa chu playoff khelh la beisei club an ni a, Odisha hian zanin dar 7:30-ah Jamshedpur an mikhual dawn.

Odisha tan playoff khel turin draw result a tawk a, tlawm pawh ni se, FC Goa-in Ningani zana Bengaluru an ngam loh chuan an tlang tho ang - Odisha an tlawm a, Goa an chak erawh chuan an point hmuh zat a inang dawn a, head-to-head a result ṭha zawk Goa an tlang ang.

An kutah

Odisha dinhmun hrilhfiah dan awlsam tak chu, playoff khel turin an kutah engkim a la innghat tih hi a ni. Zaninah hna ṭha taka an thawh a, an chak chuan, Ningani zana FC Goa inkhel tur hi awmze nei loah an chhuah thei.

Season ṭan dawnah khan Odisha hian Mizo player pariat ngawt kawlin, ISL-a Mizo player tamna ber an ni. Mahse, January-ah Lalhrezuala Sailung chu loan-a chhuahtir a ni a, I League club Sudeva Delhi a zawm - Mizo player pasarih an la awm mek.

Hetihrual hian squad a chhah avangin Mizo player zawng zawng tan hmun pawimawh chan vek theih a ni lo. Goalkeeper Lalthuammawia Ralte-in match thum khel tawhin, defender Lalruatthara'n match li a khel tawh bawk.

Kolasib midfielder Paul Ramfangzauva'n match hnih a khel tawh a, forward CVL Remtluanga hi a kum a la nau deuh avangin ISL-ah a la inlan rih lo.

Hming langsar

Indian football-ah Jerry Mawihming-thanga hi hming thar a ni tawh lo a, Mizo forward hian Odisha tan tun season-ah league match 18 khelin, match khat chiah inlan loh a la nei a, goal thum khungin assist vawi hnih a nei bawk.

Hnahthial midfielder Isaac Vanmal-sawma'n Jerry ang thoin match 18 a khel tawh a, goal khat khungin, assist vawi khat a nei a, Odisha tan midfield-ah player pawimawh a ni reng.

Season ṭantirah hliam vangin Isak Vanlalruatfela lang tam tawk lo mah se, ngai a awh hnuah Odisha tan hmun pawimawh a chang chho a, match kua a inlan tawhah goal hnih khungin, assist vawi hnih a nei bawk.

Thingsulthliah tlangval Isak-a hian tun season-ah hero of the match chawimawina vawi hnih a dawng tawh. Ani bakah hian vawi li dawngtu Mumbai City forward Lallianzuala Chhangte leh midfielder Lalengmawia Ralte (1) te chu tun season ISL-a Mizo player zinga hero of the match dawng thei an ni.

Odisha an inpeih

Isak-a chuan, "Top 6 luhna chance kan nei ṭha a, chuvangin kan ṭang khawp mai. Hetihrual hian chesual thei reng kan la ni a, fimkhur chu a ngai khawp mai," tiin Vanglaini a hrilh a, playoff inpetkai ngei an tum.

Delhi Dynamos tih hming pua ISL bul ṭantu, Bhubaneswar lama hmun an sawn hnua Odisha FC tih ni ta club hian, 2019-20 season aṭang khan Odisha hming puin ISL an khel ṭan. Odisha hming an put hnuah hian ISL playoff an la khel lo a, tun season-ah a vawi khat nan playoff khelh an tum dawn. Isak-a chuan, "A vawi khat nana playoff khelhpui ka tum em em a ni," tiin Vanglaini a hrilh.

Odisha tan hnehna chang turin Isak, Jerry leh Isaac bakah goal 12 khung tawh forward Diego Mauricio, midfielder ṭha Saul Crespo leh Atletico Madrid forward hlui Pedro Martín te an chet ṭhat a ṭul.

Chutihrual chuan Jamshedpur FC hi an league match hnuhnung pathumah an tlawm lo tawh a, Odisha tan awlsam taka chak theih a ni ngawt bik lo ang - JFC hian Ricky Lallawmawma, Laldinliana Renthlei leh PC Laldinpuia te an kawl.

Playoff chu

Team paliin ISL playoff an khelh ṭhin kha tun season aṭangin team parukah tihsan a ni - season dangah chuan top four chinin semifinal an khel nghal ṭhin a, tun season-ah erawh a ni tawh dawn lo.

League hmahruaitu Mumbai City leh Hyderabad FC chu semifinal lut chiang an ni a, palina aṭanga parukna ten knockout round khelin, semifinal lut tur an zawng thung ang.

Knockout match pakhat zawkah table-a pathumna leh parukna an inkhel ang a, table-a palina leh pangana te chu knockout match dangah an intum dawn bawk.

Semifinal hi double leg-a khelh tur a ni a, hetihlai hian knockout match erawh single leg a ni dawn thung - ISL hmawr bawk a hnai a, a boruak a 'hot' telh telh.