Free transfer-in Thuram a chhuak dawn

Marcus Thuram chuan nipui bazarah free transfer-in Borussia Monchengladbach aṭangin a chhuak dawn. Kum 25 mi French forward Thuram-a contract hi season tawp rualin a tawp dawn a, German club nen inremna an neih theih loh avangin contract a pawtsei dawn lo tih a chiang tawh.

FIFA World Cup-ah khan Thuram hi France squad-ah telin match ngaah a inlan a, Les Bleus-in final an thlen theihna kawngah tha thawh hlawk zinga mi a ni.

Qatar-a hming a chher avangin January transfer-ah Thuram hian rimtu a ngah a, a chhuah tak loh avangin Gladbach-in Thuram-a man aṭanga sum ṭhahnem tak an hmuh theihna hun ṭha an bawhpelh.

Gladbach sporting director Roland Virkus chuan, "Thuram hi a chhuah mai kan remti ta a ni. Free transfer-a a chhuak tur hi kan tan a ṭha lo a, zep tur a awm lo. Club lian zawk an awm avangin kan chelh thei ta lo a ni," tiin a sawi.

FIFA World Cup 2018-a France champion puitu defender Lilian Thuram fapa Marcus hian tun season-ah Gladbach tan match 22 khel tawhin goal 14 a khung tawh a ni.