Chelsea-in Graham Potter an thlawp

Premier League club Chelsea ṭantuten an coach Graham Potter ban thu hriat an châk a, mahse, an thuthar hriat erawh Chelsea thuneituten an coach an la thlawp rih thu a ni.

Blues hi inelna hrang hranga an match hnuhnung 14-ah vawi hnih chiah an chak a, an match tawp berah Premier League mawngphah luahtu Southampton chu 1-0 in an ngam lo bawk.

London club-in nipui leh thlasik transfer-a sum an sen zat ngaihtuah chuan Potter hi chhuahna kawngkhar kawhhmuh mai a nih a rinawm a, mahse, September-a Thomas Tuchel bantu Chelsea chairman Todd Boehly leh board chuan an coach hi an thlawp.

Chelsea thuneitute chuan Potter chu club hma hun thlir chunga an lakluh a nih avangin, tun maia hlawhtling turin an beisei hran lo a, transfer-a pound maktaduai 583 zet an sen pawhin awmze nei turin hun a mamawhah an ngai.

Blues thuneitute chuan an coach hi player inhliam an ngah lutuk chuan a tibuai nia ngaiin an chhan bawk. Saints lakah captain Cesar Azpilicueta a inhliam a, Raheem Sterling, Kalidou Koulibaly, N'Golo Kante, Mateo Kovacic, Christian Pulisic, Wesley Fofana, Edouard Mendy, Denis Zakaria leh Armando Broja te chu tun season-a inhliamte an ni bawk.

Chelsea thuneitute chuan tun hnaiah result ṭha nei lo mah se, an team khelh danah hmasawnna a awmah an ngai a, Blues hi Champions League-ah che ṭha loin, season tharah European football khel lo pawh ni se, Potter hi ban an tum lo!

London club hian Champions League last 16 first leg-ah 1-0 in Borussia Dortmund an ngam lo a,Stamford Bridge-ah second leg an la khel dawn thung. Premier League table-ah 10-na ni mekin, point 11-in top four china awm mek Tottenham Hotspur an phak lo bawk.

Kum 47 mi Potter hian Brighton & Hove Albion chhuahsanin, September 8, 2022 khan Chelsea hi a zawm a, kum nga chhung atan contract a ziak. Match 25 kaihruaiin, vawi kua a chakpui a, vawi sarih draw neiin, vawi kua an tlawm - a chak percentage hi 36% a ni.