Steffi Graf nih rualtu Djokovic

Novak Djokovic chuan tennis huanga world number 1 ni rei ber Steffi Graf a nih rual ta, ranking chung berah hian chawlhkar 377 chhung hun a hmang ta, kar leha ranking a chhuah thar hunah chuan record a siam thei dawn a ni.

Kum 35 mi Djokovic hian mipa bikah chuan kum 2021 March thla khan world number 1 ni rei ber record a lo siam daih tawh, hmeichhe legend Steffi Graf record nihrual tur chuan hun a mamawh rei ta deuh a ni.

Season hmasa khan Djokovic hi a ranking a tlahniam hman viau, mahse nikum US Open hnuah Carlos Alcaraz a inkhel chhunzawm tam thei lo. Spanish tlangval hian hliam vangin number 1 nihna a humhim thei lo - Novak tan hun ṭha a inher chhuah theih phah.

Australian Open nomawi a chawi khan number 1 dinhmunah a let leh chiah, thla ruk hnuah a chung berah a kir leh chauh a ni. Tun dinhmunah point 7070 a nei a, amah hnaih bertu Alcaraz aiin point 590 in a sang zawk.

Alcaraz hi tunah chuan a hliam dam tawhin tournament a khel leh thei tawh, kar hmasa khan Argentina Open-ah inlanin a champion leh nghal. French Open hmain tournament hmachhawn tur an nei nual dawn, inelna a hmuhnawm zel dawn.

A zawna world number 1 nih rei lamah chuan Djokovic hian Roger Federer a tluk lo. Serbian star hi kar 122 chhung a chung berah a awm, a tluk loh Federer chu chawlhkar 237 chhung teh meuh a chungah a awm, Jimmy Connors (160) leh Ivan Lendl (157) ten record an nei ṭha bawk.

Mipa tennis world ranking hi kum 1973 aṭanga siam ṭhan a ni a, kum khat hnuah hmeichhe ranking an siam chhunzawm ve bawk. Tun dinhmunah Iga Swiatek chuan fak takin number 1 dinhmun a luah.

Swiatek hian kar hmasa khan Qatar Open nomawi a chawi, a champion title humhim tur hian tournament a khelh chhung zawng khan game nga chiah a hloh, final-ah Jessica Pegula a hneh. Pegula hi chak lo mah se ranking lamah chuan pathumnaah a inhlangkai ve bawk.