Russia leh Belarus tel remti lo zingah UK

International Olympic Com-mittee (IOC) chuan Paris Olympic neih turah Russia leh Belarus infiammite chu neutral athlete anga inlan dan kawng a ngaihtuahsak, hei hi ram 30 chuangin an thlawp lo, a thlawp lo zingah hian United Kingdom pawh an tel.

Russia leh Ukraine an indo a, he buaina chhuah chhan leh tharum thawh hmasatu Russia leh amah pui bawmtu Belarus chuan hremna hrang hrang an lo hmachhawn tawh, infiamna huangah ngei pawh nasa taka hrek an ni mek.

Mahse, IOC chuan infiamna huanga politics lakluh a remti lo, infiammite chu kawng a dapsak hram hram ṭhin. An ram hming chuan an inlan a remti bik lo a, amaherawhchu mimal dikna chanvo erawh a humhalhsak ṭhin.

UK culture secretary Lucy Frazer chuan, "Ram hrang hrangin Russia leh Belarus hrem ṭha an tih chu keini pawhin kan thlawp. International Olympic Committee thutlukna kha ngun takin kan lo ngaihtuah ve a, keini chuan kan pawm thei lo," a ti.