An ramah Hamilton a chungnung Tyre pakhat chhe chungin a tlan tluan

Lewis Hamilton chuan an rama neih British Grand Prix-ah a vawi sarih nana hnehna chang. Silverstone tlankawnga car intlansiakna sang berah hian record nei ṭha ber a ni a, a hnungah hian Max Verstappen a thleng. Britain tlangval hian pole position aṭanga bul ṭanin inelna thunun viau mah se lap hnuhnung berah a motor ke hma vei lam a chhia a, thlak loa tlan tluan luiin hnehna a chang - driver championship lamin point 30 zetin hma a hruai fal leh der tawh.

England rama tlan kawng hmingthang Silverstone Circuit chu 5.891km a thui a ni a, car inthlansiak nan hian vawi 70 an tlan hel ṭhin - a tlangpuiin intlansiak vawi khatah hian 412km vel an tan ṭhin tihna a ni. Qualifying lama che ṭha tak Hamilton chu Pathianni tlaia inelna tak an neih hian a hmasa berah a ding a, driver dang hmaah tlanin inelna pawh a thunun viau. Mahse, Mercedes car-in tyre an hman a fuh tawk lo, lap hnuhnung ber an tlan laiin a chhe tawh viau.

Hamilton-a'n pit stop vawi khat chauh hmang chungin inelna a hmang tluan a, tyre chhe tak nen a chak. Pahnihna Verstappen-a'n pit stop vawi hnih a hmang thung, a tawpa an inthlauhna chu 5.856 seconds chauh a ni - tawnhriat ngah Hamilton hian 'risk' a la fuh. Mercedes driver pakhat zawk Valtteri Bottas pawhin lap hnuhnung pahnih tlan hmabak an la neih laiin tyre chhia vangin harsatna a tawk. Mersedes-in pakhat leh pahnihna dinhmun luah theih tura inngai kha Bottas zawk hi 11-naah a thleng thei hram a ni.

Champion lai Hamilton-a'n a teammate Bottas lakah point 30 zetin hma an hruai fal leh ta a, a vawi sarih nan a champion leh ngei pawh a rinawm - a champion a nih chuan record nei ṭha ber Michael Schumacher (7 titles) a nihrual chiah dawn. Kum 35 mi Hamilton hian F1 huangah hian vawi 87 hnehna a chang tling ta chiah a, a chungah hian vawi 91 chak thei Schumacher a la awm - a tlan ṭha tluang a nih chuan tun season chhung pawhin hnehna chang hnem ber nih theihna kawng a inhawng.

Hamilton chuan, "Bottas-a'n tyre chungchangah harsatna a neih kha kei pawh ka inngaihven ve nghal vat a, car kha engmah sawiselna tur a la awm lo, a kal dan pangngaiin a la awm vek. Mahse hun rei vak lo hnuah harsatna kha a rawn thleng. "Hmun tiam ka thleng ṭep tawh a, huaisen taka tlan tlang kha ka duh. Chumi tur chuan vanneih tel a ngai a, ṭha taka thlen leh tlan muan palh ai chuan ka motor ke kha a vir zel theih nan zawk ka ṭawngṭai tawp mai a ni," a ti.