Westbrook a ropui zel

Nimin zing NBA inkhelah Houston Rockets chuan Milwaukee Bucks lakah 120-116 in hnehna an chang a, inkharkhip hma lama player langsar Russell Westbrook bawk a hmuhnawm chhunzawm zel.

Westbrook hian Bucks lakah minute 38 a khelh chhungin point 31 a nei hman a, basketball inelna sang berah hian match a khelh hnuhnung 36 zetah point 20 chung lam a nei thei ziah. Rockets chak theih nan hian James Harden chuan point 24 a nei ve bawk.

Milwaukee thiampuipa Giannis Antetokounmpo-a'n point 36 a nei a, rebounds vawi 18 lain assist pariat a nei bawk - khel ṭha viau mah se a ṭhiante aṭangin thlawpna a dawng ṭha tawk lo a, hnehna chan nan a tawk zo lo.

Inkhel dangah DeMar DeRozan chun hun tawp hma chiaha free throw vawi hnih lutin San Antonio Spurs chu Memphis Grizzlies lakah 108-106 in a chakpui. Boston Celtics pawhin Portland Trail Blazers chu 128-124 in an hneh ve bawk.