Ennawm Part II - Kan nghak chhuak leh ta; Man United Vs Barcelona

Leicester City an hneh zawhah Manchester United manager Erik Ten Hag chuan, "Ningani zanah lo kal leh ru. Inkhel pawimawh a ni a, nang ni nena kan ṭankawp chuan Barcelona kan hneh thei ang," tiin inkhel en turin fan-te a sawm.

Zanin dar 1:30 hian Theatre of Dreams ti hiala hminglem an pek Old Trafford-ah Manchester United-in Barcelona an mikhual dawn a, Ten Hag-a'n 'home advantage' neih belh theih nan entu ṭha zawk a duh.

Kar liam ta khan Nou Camp-ah first leg khelh a ni tawh a, 2-2 a ni satliah lo - a hmuhnawm. Zaninah chuan Europa League last 16 lut tur chinfel a nih dawn avangin a hmuhnawm lehzual tura ngaih a ni a, minute 90 chauh ni loin minute 120 zawk pawh a ni thei - penalty shootout hial pawh a ni thei bawk.

Man United tan Barcelona hneh hi an hna hmasa tur a ni a, Pathianni zan hian Wembley Stadium-ah Newcastle United nen League Cup final-ah an inkhel dawn. Tunah erawh Ten Hag-a hoten nomawi thlir loin Barca chauh an ngaihtuah a ṭul ang.

Ennawm tur chu

Zanin inkhel tur hi Europa League ni loin Champions League inkhel ni se, a ropui lehzual ang. Chutihrualin Europa League ni mah se Barca hi La Liga hmahruaitu an ni a, Man United hi Premier League-a pathumna an nih bakah inelna palia champion beiseina nei vek an ni.

Team pahnih 'history' thlir tel phei chuan Europa League-a inkhel atan an ṭha mah mah hret a tih theih hial awm e. Barca hi an player ropui Xavi-a'n a enkawl a, Catalan club hian sum dinhmun tlakchhiatna chu remchangah lain squad tih chhan nan an hmang zawk.

Hei vang tak hian tlarhmaah Robert Lewandowski te an kawl thei a, kil tinah player ṭha an kawl. Barca hi Man United manager Ten Hag-a awh em em Frenkie de Jong neitu an ni a, hei hian an squad ṭhatzia a sawifiah.

Chutihrualin zaninah erawh Barca hian hrem vangin Gavi an chhawr thei dawn lo a, hliam vangin Pedri an inlan thei dawn lo - Ousmane Dembélé pawh a khelh theih loh a rinawm zawk. Catalan club tana chanchin lawmawm erawh Sergio Busquets a rawn kir thei dawn a, pressure sangah a tawnhriat hi a pawimawh ang.

Man United erawhin inhliam thar lam an nei lo a, Lisandro Martinez leh Marcel Sabitzer te chhawr theih an ni tawh dawn. Ten Hag-a'n duh thlan tur player a nei a, Leicester an hneh ṭumah Jadon Sancho a che ṭha a, hei hi United tan chanchin lawmawm a ni. Hming langsar ber tur erawh Marcus Rashford a ni a, English forward hian goal khung hi ngaiah a nei tawh.

Dinhmun ṭha zawk

Barcelona hian Man United lakah hian record ṭha tak an nei a, match hnuhnung 11-ah vawi khat chiah an chak lo - vawi nga chakin vawi nga an inhnehtawk. Catalan club hian kartawp khan Cadiz 2-0 in an hneh bawk a, beiseina sang tak nen Old Trafford an tlawh dawn. Mahse, Xavi tan Dembele, Gavi leh Pedri te awm lo tur hi channa lian tak a ni ang.

Man United erawh mahni muala khel tur an ni a, kartawpah Leicester City 3-0 in an hneh bawk. Ten Hag-a hote tan hun ṭha a inher chhuak turah a ngaih theih a, chutihrualin Dutch manager hnuaiah Man United hi hun pawimawhah an chesual ngun hle. Man United hian Real Sociedad lakah goal khung tam hret se, Barca pumpelh thei an ni. Chutiang bawkin Premier League nomawi beiseina neih theihna hun ṭha an neih laiin Crystal Palace, Arsenal leh Leeds lakah point an hloh. Man United dinhmun a ṭha zawk ngei a, mah se last 16 lut tur erawh hriatthiam a har hle.

Inkhel dang pasarih

Nantes vs Juventus
Juventus-in an mualah Nantes an hneh thei lo a, 1-1 in an inhnehtawk. Stade de la Beaujoire-ah Italian club tan hna a harsat phah ang. Juve boss Massimiliano Allegri chuan, "Second leg hi final anga kan khelh a ṭul dawn," tiin a sawi.

Old Lady hi an chak lo a nih chuan UEFA club coefficient-a anmahni aia rank 109-a hniam an hneh dawn lo tihna a ni. Kartawp khan RC Lens-in Nantes hi 3-1 in an sawp a, Juventus-in Spezia 2-0 in an hneh - khualmuala khel tur ni mah se Turin club hi rinkai zawk an la ni fan ang.
Midtjylland vs Sporting

First leg-ah Sporting Lisbon an vannei a, injury time-a captain Sebastián Coates goal hmangin siphurh an sut hram a, Midtylland nen 1-1 in an inhnehtawk. Kartawp khan Danish club hian an league-ah Viborg chu 4-0 in an sawp. Mahse, Sporting hian UEFA club hi khualmualah vawi thum hmachhawn tawhin an chak vek. Record en let chuan Portuguese club dinhmun a ṭha.

Rennes vs Shakhtar Donetsk
Shakhtar Donetsk-in thlasik bazarah Mykhailo Mudryk chu Chelsea lakah an chan. Ukranian club hian Mudryk awm loh hnuah harsatna an tawk lo a, a thlakna Dmytro Kryskiv chuan Rennes lakah goal hmahruai a khung.

Shakhtar hian first half-ah goal hnih khung mah se second half-ah an tha a zo. Ukrainian club tan thla thum hnua an match hmasa ber a nih avangin match fitness an nei lo a, second leg-ah minute 90 khelh a la ngaih avangin mahni muala khel tur Rennes pawhin beiseina sang tak an nei ang.

Monaco vs Leverkusen
BayArena-ah Monaco leh Bayer Leverkusen ten goal an inkhung chhawk a, injury time-ah French club tan Axel Disasi-a'n khungin khualmualah mikhual team 3-2 in an chungnung. Stade Louis II-ah second leg khelh a ni dawn a, inkhel a la nung dawn.

Monaco goalkeeper Alexander Nubel chuan, "Second leg-ah pawh thil danglam a la thleng thei a, inkhel a la zo lo," tiin a ṭhiante chu ngaih ṭha taka awm lo turin a fuih. German club hi Xabi Alonso enkawl a ni a, German rawlthar duhawm Florian Wirtz awmna a nih bawk avangin result pawh la thleng thei a ni.

Union Berlin vs Ajax
Ajax-in coach thar John Heitinga hnuaiah match li an chak zawn a, Union Berlin-in an tihtawpsak. German club hi an vanneih ṭum ni se Amsterdam Arena-ah hian chak zawk thei an ni. Dutch club hian first leg-ah goal zawnah pawh an pet lo.

Ajax defender Calvin Bassey chuan, "Union Berlin tlarhnung kan ṭhiah theih a ngai," tiin a sawi. Union Berlin hi German club zinga Armsterdam-a clean sheet hmasa ber an ni a, an mual Alte Forsterei-ah Ajax hi hneh an tum ang.

PSV vs Sevilla
PSV-in first leg-ah beisei an pha lo a, an khingpui Sevilla an ṭhat bawk avangin 3-0 ngawtin an tlawm. Spanish club tan substitute Lucas Ocampos a che ṭha a, goal a khung bakah Nemanja Gudelj khung tur a siamsak bawk.

Sevilla hi Europa League-a club hlawhtling ber an ni a, vawi ruk ngawt an champion tawh. Tun ṭumah hian UCL aṭanga tla thla an ni a, PSV lakah rinkai zawk an ni. Ruud van Nistelrooy hoten hnehna chan an tum a nih chuan ṭan phat aṭangin an nawr a ṭul dawn a ni.

Roma vs Salzburg
Salzburg captain Andreas Ulmer chuan ngaihṭha takin Rome kan tlawh dawn, a ti. Austrian club hian an mualah AS Roma chu minute 88-naa Nicolás Capaldo goal hmangin 1-0 in an hneh a, an khingpui tur Jose Mourinho enkawl a nih miau avangin hmabak a la harsa dawn.

Roma boss José Mourinho chuan, "Extra time hruai thleng turin goal khata chak kan mamawh a, last 16 lut nghal tur chuan goal hniha chak a ngai," tiin chak ngei an mamawh thu a sawi. Portuguese manager hian FC Porto (2002-03) leh Manchester United (2016-17) a enkawl laiin UEFA hnuaia inelna sang ber dawttu hi a lo champion tawh a ni.