Napoli an ṭha tak tak

Napoli-in vanneih vanga Serie A hmahruaitu an ni lo tih Champions League-ah an lantir a, Thawhlehni zan khan Europa League champion lai Eintracht Frankfurt chu khualmualah 2-0 in an hneh.

Deutsche Bank Park-ah Napoli winger Khvicha Kvaratskhelia-a'n penalty hlah mah se first half-ah vek Victor Osimhen hmangin hma an hruai tho. Second half-ah Frankfurt chhuanvawr Randal Kolo Muani chu hnawhchhuah a ni a, Italian club-in an tamna hmang ṭangkaiin Giovanni Di Lorenzo hmangin an khung belh leh bawk.

Frankfurt-in bul an ṭan ṭha a, Randal Kolo Muani leh Mario Gotze ten hun ṭha an hlah. Luciano Spalletti kaihruai Napoli an insiamṭha a, a hnu lamah inkhel an thunun hneh hle. Frankfurt keeper Kevin Trapp-a'n hna thawh tur a ngah a, Khvicha Kvaratskhelia leh Piotr Zielinski bakah Hirving Lozano ten hun ṭha an bawhpelh vek.

Osimhen-a'n a thawhrim rah sengin penalty a hlawh chhuak a, Kvaratskhelia-a'n goal-ah a chantir thei lo. Napoli erawhin inkhel an thunun rah an seng ta tho a, Hriving Lozano siam chu Osimhen-a'n minute 40-naah a khung.

Nigerian striker Osimhen hian goal dang khung belhah inngai mah se offside vangin pawm a ni lo. Second half-ah Frankfurt buaina belhchhah turin Randal Kolo Muani chu hnawhchhuah a ni a, Zambo Anguissa a tlawh vang a ni.

Italian club-in an tamna an hmang ṭangkai a, Kvaratskhelia siamsak chu Di Lorenzo-a'n minute 65-naah a khung. Napoli-in goal tam zawk khung thei mah se 2-0 ah an lungawi a ṭul a, first leg an khelh dan thlirin quarterfinal an thlen ngei pawh a rinawm hle. Amaherawhchu manager Luciano Spalletti-a'n tling chiang tih ngaihdan nei a duh lo. Napoli boss chuan, "Tu pawh kan tling tawha inngai chuan second leg an khel lo ang," tiin a sawi thung.