Hotshots leh Vikings an chak

Mizoram Super League season 8 khelh laiah Mission Veng Hotshot leh Chanmari Vikings ten an khingpui ve ve an hneh, team pahnih hi vawiin tlai dar 5:00 hian R. Dengṭhuama Indoor Stadium, Mualpuiah an inhmachhawn zui leh nghal ang.

Thawhlehni zan inkhelah Vikings hian Champhai District BBA chu 76-71 in an hneh. Champhai hian bul an ṭan fuh a, an chet ṭhat zual lai chuan point 17 teh meuha hmahruai lai pawh an nei.

Mahse, hun pawimawhah tawnhriat an neih tlem a lang ṭhin. Vikings lamin zawi muangin an pawtthla a, quarter li an khelh zawh meuh chuan point ngain an sang zawk. Arlando Demontee Cook (33 points) bakah point 17 neitu Lalhlunmawia te an khel ṭha hle.

Inkhel dangah Mission Veng Hotshots chuan Tuikual South chu 102-91 in an hneh. Season dang ang chu ni se Phengphehlep tan an point neih zat hi chiang taka chak pui tham tur niin a lang.

Amaherawhchu, tun season MSL-ah chuan point an nei tam ṭhin hlawm hle, point 100 chuang neih an harsat lo. Hotshots hian mimala point 40 nei tling thei Christopher Galbreath Jr an nei a, Samson Lalchhuanawma (20 points) leh Lalrozama (19) ten an thlawp ṭha bawk.