Curry-a'n training a zawm

Tun thla tira hliam tuar Stephen Curry chuan basketball a khel thei leh dawn hnai ta. Thawhlehni khan Golden State Warriors training-na hmunah Curry hi a inlan leh thei tawh a, inelna tak hmachhawn turin nghah rei a ngai tawh lo ang.

NBA Most Valuable Player vawi hnih ni tawh Curry hi a ṭhiante zingah chuan a la training lo, mahse zawi muangin a hma a tih tur awmte a ti ṭan thei leh dawn tawh niin a lang, coach Steve Kerr pawhin beisei a nei sang hle.

GSW coach Steve Kerr chuan, "Hliam a neih hnuah tun ṭum hi basket-ball court-a a lo kal lehna hmasa ber a ni, training hautak lo zawk a ti chho thei thuai turah kan ngai," tiin a sawi a, player dang leh Warriors ṭantute tan thu hriat nuam a ni ang.

Kum 34 mi Curry hian tun season chhungin match 38 a khel tawh, a inkhelh hoah hian chawhrualin match tin - 29.4 point leh 6.4 assist bakah rebound 6.3 la ziah anga chhut a ni a, team tan player pawimawh bik zinga mi a ni.

All Star Game khel tur pawhin thlan a ni, mahse a thiam bik ten ennawm buatsaihna hunah hian hliam vangin a inlan thei lo. February 24, Zirtawpni hian Los Angeles Lakers an hmachhawn dawn a, hemi hunah pawh Curry hi a la inlan thei lo ang.

Western Conference table-ah Golden State hi pakuana an ni mek, tun dinhmunah chuan playoff khel phak zingah an awm lo tihna a ni. Chutih rualin team tin an inthlau lo a, match khat result lek pawhin an dinhmun hi a la ti danglam thei reng a ni.