Burnley-in Premier League an hnaih zel

Championship hma-hruaitu Burnley chuan Thawhlehni zan khan Millwall an tlawh a, 1-1 inhnehtawk mah se league hmahruaitu an ni chhunzawm zel.

Clarets hian Ashley Barnes hmangin minute 51-naah hma an hruai a, kar liam taa Luton Town laka goal awmchhun khungtu hian chakna goal a khung leh turah ngaih ni hman mah se thawnthu a inang ta lo.

Mualneitu Millwall lamin Tom Bradshaw-a'n minute 85-naah siphurh sutna goal a khung. Kum 30 mi Bradshaw hi tun hnaiah a che ṭha hle - kar liam taa Sheffield United an hneh ṭumin hattrick a siam tawh bawk.

Vincent Kompany kaihhruai Burnley hian point khat chauh an hlawh chhuak nachungin match 33 aṭangin point 73 an hmu a, pahnihna Sheffield United aiin point 12-in an hmu sang zawk. Clarets hi record siam thei dinhmunah an ding a, season khata point hmu tam ber chu Reading niin point 106 an hmu. Tunah hian match 13 khelh tur an la nei a, point 42 hmuh theih aṭanga point 32 an hmuh chuan record an siam ang.

Championship-ah hian team 24 an awm a, season khatah match 46 khelh tur a la awm. Michael Carrick-a enkawl Middlesbrough pawh tlak hlauhawm aṭangin pathumnaah dinhmunah an insawhnghet chho a, point 57 hmuin pahnihna Clarets hi point li chauhin an pha tawh lo.