India U17-in Qatar nen friendly match khel dawn

AFC Under-17 Asian Cup khel tura inbuatsaih mek India chuan Asia khawmualpuia football thiam ram, Qatar Under-17 team nen friendly match vawi hnih an khel dawn.

Ruahman dan chuan match hmasa zawk hi February 25, Inrinniah khelh tur niin, February 28, Thawhlehniah match hnihna an khel ang - match hnih hi Qatar-a khelh tur ve ve a ni.

AFC Under-17 Asian Cup hi May 3-20 chhung hian khelh a ni dawn a, nikum khan team 16 inelna turah hian India hi an inpetkai - captain chu Mizo rawlthar Vanlalpeka Guite (Sentea) a ni.

Sentea hi Khawzawl Zuchhip Veng rawlthar a ni a, nikum September khan a captain-na hnuaiah India U17 chu South Asian Football Federation Under-17 ah an champion tawh bawk.

India U17 captain Sentea bakah hian Bawngkawn winger Lalpekhlua chu India squad-ah hian a awm bawk a, ani pawh hi SAFF U17 champion team zingah khan a tel a ni.