Bengaluru mualah FC Goa an leng dawn

Indian Super League season tawp a hnai zel a, zanin dar 7:30 hian Bengaluru FC leh FC Goa te an intawng dawn - Bengaluru hian playoff an khel dawn chiang tawh a, he thu buatsaih a nih lai hian FC Goa dinhmun a la chiang lo thung.

Nizan khan Odisha leh Jamshedpur inhmachhawnin, he thu buatsaih a nih lai hian result kan hre hman lo - Odisha hi draw result ringawt pawhin playoff khel turin an tling dawn a, an tlawm a, Goa an chak erawh chuan FC Goa an tlang dawn thung.

Hetihrual hian Bengaluru pawh playoff khel turin tling chiang tawh mah se, zanin an inkhel tur hian an tan awmzia a la nei phak - hnehna an chan chuan top three nih chance an nei dawn a, table-a pathumna hian playoff-ah parukna an tum dawn a, a kalkawng awlsam deuh tura ngaih a ni.

Bengaluru FC hian beisei angin season bul ṭan lo mah se, an league match hnuhnung pasarihah an chak vek a, playoff khel turin an tlin phah - tlawm chunga league round khar an duh lo ang.

Goa-in Odisha result hre sain Bengaluru hi an hmachhawn dawn a, playoff khel thei dawn lo pawh ni se Carlos Pena enkawl team hian tlawm chunga season khar chu an duh dawn bik lo.

Bengaluru-in squad-ah Mizoram player kawl an nei lo a, FC Goa-ah erawh Ayush Chhetri leh Lalremruata Pialtu te an awm thung - Ayush hi ISL-a a season hmasa bera an league match 19 khelh tawhah a la inlan vek!