Marquez-a'n beisei a nei sangMarquez-a'n beisei a nei sang

Bike intlansiakna sang leh ngaihhlut ber MotoGP season thar a hnai, tun hnai kum hnih chhung hliam vanga buai tawh Marc Marquez chuan kuminah result ṭha neih theih ngei a inbeisei, a bul aṭanga chet fuh nghal a tum dawn.

Marquez hian MotoGP title paruk ngawt a la tawh, mahse kum 2020 khan inelna hmasa berah a chesual a, a ban ruh tliak zai a ngai hial. A hliam hi vawi li lai zai nawn a ngai a, dam fel tawha ngaih a nih hnuah pawh a buai phah leh ṭhin.

Kuminah erawh harsatna a nei tawh rih lo. Spanish reider Marquez chuan, "Tunah chuan na ka nei lo, inelna hmachhawn tura nasa taka inbuatsaih chu ka tih theih a ni mai. Doctor nen kan inbia a, ani chuan engkim a ṭhat thu min hrilh.

"Inelna chu thua sawi chi a ni lo, chuvangin a ṭha ber ni tur chuan inbuatsaihna ṭha a ngai. Season ṭan hun hi thla thar mai a ni dawn a, pre season phei chu tun aṭanga rei lo teah kan ṭan dawn, ka nihna tak lantir turin ka inlan ang," a ti.

Repsol Honda tan Marquez hian kum 2024 thleng daih contract a nei mek, kum 30 mi a nih tawh avangin champion hnem ber record siam a duh a nih chuan atan hun ṭha hnuhnung lam a ni zel tawh, chutih rualin a ṭha berte zinga mi chu a la nih ngei a rinawm.