A hma angin ka inkhel leh thei tawh - Zverev

Alexander Zverev chuan hliam leh harsatna dang a nei tawh lo tih a sawi a, tun hma lama nuamti taka tennis a khelh ang khan a inkhel leh thei tawh tih a sawi, atan chuan season beisei awm tak a ni thei ang.

French Open 2022 semifinal-ah Zverev leh Rafael Nadal an inkhel a, hliam vangin Zverev hi a inkhel chhunzawm thei lo. A kerek a bilh a, tennis court aṭangin wheelchair hmanga nawr chhuah a ngai hial.

German tlangval hi tun hnaiah a inkhel leh zauh zauh tawh, mahse ngai a la awh thei rih lo. Tun kar chhunga khelh tur Qatar Open lamah erawh beisei a nei sang hle - a match hmasa atan Andy Murray a hmachhawn dawn.

Kum 25 mi Zverev chuan, "Thla hmasa vel kha chuan ka ke hi dim a la ngai a, eng emaw chhang chuan ka hlauthawngin na ka la ti deuh bawk. Tunah erawh hlauhthawn tur ka nei tawh lo, na pawh ka hre tawh lo.

"Ngaiawh leh nghal thut chu thil har tak a ni, chutih rualin tun hnaia ka dinhmunah hian ka lawm. Hliam na tak ka tawh khan ka zin daih a, rilru engthawl leh inngaihtuah hah miah loin ka awm, kha khan nasa takin min chhawkin ka hria," a ti.

Player ṭhenkhat chu hliam an tawrh avanga ṭha chhuak thei ta lo an awm nual, an taksa bakah na takin an rilru a nghawng ṭhin. Zverev erawhin a natna a inhnehtir duh lo a, thawhchhuah leh a tum ruh hle.