Liverpool nomawi beiseina a tawp?

Premier League-ah Liverpool nomawi beiseina a tawp a, League Cup leh FA Cup-ah beisei tur an nei tawh lo bawk - heng zawng zawng an chunga a thlen laia an inhnemna ber Champions League-ah meuh pawh Liverpool beiseina chu a zam ral mek.

Thawhlehni zan khan Champions League last 16 first leg-ah Liverpool chuan Real Madrid an mikhual a, Darwin Nunez leh Mohamed Salah hmangin, minute 15 pawh tling loah 2-0 in hma hruai mah se Real-in comeback ropui an lantir.

European champion ni lai hian first half chhungin Vinícius Júnior hmangin si phurh an sut zo a, second half-ah Karim Benzema goal hnih leh Eder Militao hmanga khung belhin, Anfield-ah 5-2 in an chak.

March 15 zanah team pahnihin second leg an la khel leh dawn a, mahse, Santiago Bernabeu-a inkhel tur an nih avangin, Liverpool tan comeback tur chuan thil mak danglam bik a thlen a ngai tawh ang.

Beiseina siamtu

Liverpool-in an khelmual Anfield an chhuang ṭhin a, an fan-te thawmah ringawt pawh team tam tak chu hlauin an khur ṭhin - mahse, Thawhlehni zana an tawn erawh Real Madrid an ni a, world class player rual kawltu team hian an hnufual lai pawhin an hlauthawng lo.

Reds hian minute lina lekah Nunez hmangin goal hmahruai an khung a, Salah siamsak aṭanga Uruguayan forward-in a khen luh dan hi a mawi takzet - player thiam bik ke aṭanga chhuak awm renga mawi a ni.

Liverpool-in an la duhtawk mai lo. Minute 14-na lekah Real goalkeeper Thibaut Courtois a chesual a, ball petchhuah a tumna lamah Salah a pe a, Egyptian forward hian an goal hnihna khung turin harsatna a tawk lo.

Hetihlaia zawhna awm pakhat chu, "Liverpool an chak ang em?" tih aiin, "Goal engzat nge an khung belh ang?" tih chu a ni a, Anfield thawm pawh a ṭha hle.

Mahse maw...

Liverpool-in goal hnih an khung hian world class team an tum tih inhria se, tlarhnung ven chhunzawm hna thawk mai se, an tihfuh a rinawm - mahse, Jurgen Klopp-a'n ngaihdan dang a nei a, an nawr chhunzawm.

Reds an chesual zui a, Newcastle United an hneh ṭum pawha tlarhnung phui lo team hi a la phui chuang lo a, Magpies aia Real danglamna chu an thiam tak tak a, an chance neih an hlah ve lo.

Minute 21-na lekah Vinícius chuan Joe Gomez, Fabinho leh Trent-Alexander Arnold ten an veng chungin, harsatna nei loin si phurh sutna goal a khung a, Liverpool tlarhnungten an tih tur an ti tawk lo tih a lang.

A la tawk lo cheu - Courtois chetsual thik ni awm fahranin, Liverpool keeper Alisson a chesual zui ve leh a, Brazilian keeper hian petchhuah a tumna lamah Vini a pet per a, Liverpool goal-ah a lut daih!

Anfield a reh

Liverpool-in chawlhlawk hmain si phurh an sut zawhtir a, Klopp-a hna hmasa tur chu tlarhnung remphui a ni. Mahse, second half ṭan aṭanga minute hnihna lekah Real an inlar nghal a, Gomez-a freekick chawi aṭanga ball kal chu Militao chuan goal hmahruai atan a khung.

Reds tlarhnungte marking a ṭha tawk lo a, an hna an tlin tawk lo. Tlarhnung tluk zetin Liverpool midfield an chesual ngun a, a bik takin kum 18 mi Stefan Bajcetic tan Champions League-a Real hmachhawn chu a la sang lutuk hret niin a lang.

Liverpool an insiamrem hman lo - minute 55-naah Benzema shot naran tak anga lang chuan Gomez-a ke perin, Alisson-a rin loh lamah a lut a, a tira 2-0 a hnufual Real-in goal li an khung der. Mahse, Klopp-a'n tlarhnung leh midfield siksawi aiin tlarhmaa Nunez leh Cody Gakpo lakchhuah thlangin, Roberto Firmino leh Diogo Jota a luhtir a, German coach-in duh a thlang sual tih hre turin hun a mamawh rei lo.

Minute 66-naah Fabinho tihsual nangchingtu Luka Modric chuan ṭha zeta ball a tlanpui hnuah Vini a pe a, Benzema ke bul a thlen hnuah French striker hian duhthala Liverpool tlarhnung bumin, an goal ngana a khung.

Insiamṭhat a ngai

Liverpool-in season an hman ṭhat lohzia inhrilh nawn a ngai lo. Chutihrual chuan an match hnuhnung pahnihah Everton leh Newcastle United an hneh a, season hmasaa team ṭha tak Liverpool kha kan hmu leh ta niin a lang.

Mahse, Real an hmachhawn meuh chuan Liverpool tlarhnung nghin nasatzia hmuh tirin kan awm a, Virgil van Dijk hoin ding mah se eng an ni chuang lo.

Reds-in goal li an chhuah hnuah Klopp-a'n tlarhnung leh midfield a thlak danglam dawn emaw tih laiin, tlarhma player-te bawk a luhtir a, goal khat dang an chhuah belh zui.

German coach hian goal nga an chhuah hnuah Joel Matip leh James Milner a luhtir leh lawi a, a tawp lamah chuan goal khung aiin mualpho lutuk loh chuan rilru a luah tawh zawk niin a lang a, Anfield-ah dawl zawrin Liverpool an zawr.