Neymar kha a inhliam tak tak!

Paris St-Germain chuan an forward Neymar chu a kerek a ulh tih an sawi a, a tha chat a awm bawk. Brazil international hi PSG leh Lille ten kartawpa Ligue 1 match an khelh laiin a hliam vang hian zawn chhuah a ni.

February thla tawp leh March thlatir vel bawrah Neymar hian hliam a nei deuh ziah tia sawi theih a ni, hliam a neih loh pawhin hrem vangin match a khel lo fo bawk - a farnu Rafaella piancham nen a inrual a, a lawm turin an ramah a haw ṭhin.

Tun ṭumah pawh hian hliam vanga zawn chhuah ni mah se, khawthlang media ṭhenkhat chuan a hun ngaiah bawk a hliam leh ta anga sawi a tam. Tun season erawh hliam tak tak, a chawlh chen tur erawh sawi theih a la ni lo thung.

Thu chhuah siamin PSG chuan, "Paris Saint-Germain leh Lille inkhelh ṭuma Neymar hliam chu endik a ni a, a kerek a bilh bakah tha zam chat a awm, kar leh hian a dinhmun tur kan sawi chian theih kan beisei.

"A khupa hliam tuar Nuno Mendes erawh a dinhmun a ṭha, tun kar tawpah chuan training a zawm leh hman tawh ang," tiin an sawi a, theih ni se chuan Bayern Munich nen Champions League an khelh hunah chhawr an duh ang.

Kylian Mbappe chuan Instagram story-ah Neymar hi dam leh thuai tura a duh thu a sawi a, tun hnaia boruak ṭha lo anga an sawi chu a dik lo a ni tih lantir nan France international hian Lille laka goal a khung lawm nan Neymar hi a lo kuah tawh bawk.

PSG hian Champions League nomawi chawi an duh, mahse, last 16 first leg-ah Bayern Munich chu 1-0 in an hneh lo. Bayern laka an chak loh hnu hian Mbappe chuan, "Kan la tlawm lo, tho chhuak leh turin kan bei ang, kan tan kawng a la inhawng.

"Ṭha taka khel tur chuan zanah ṭha taka kan mut a ngai," tiin a lo sawi zauh tawh. Bayern nen an inkhelh hma zan hian Neymar chu zan rei tak thleng a leng a, thlalak a darh leh si avangin hei hian sawi zui a hlawh.

Mahse, Mbappe chuan, "Neymar ka sawina a ni lo, ṭha taka khel tur chuan player zawng zawng kan mut ṭhat a, tha kan khek thiam a ngai a ni tih ka sawina a ni," a ti, a hnua match an khelh dun lehah pawh an in haw lo tih a takin an lantir.

Season kal laiah Neymar hian PSG tan goal 18 khungin assist pawh vawi 17 a nei tawh. Champions League bikah goal hnih khungin assist vawi thum a nei bawk, an duh ber European football inelna sanga champion tur chuan Neymar hi an mamawh.