Sania Mirza hun a liam ta

India hmeichhe tennis player zinga thleng sang ber, doubles huanga world number 1 pawh ni phak Sania Mirza chuan tennis tournament hnuhnung ber a khel zo, a kawppui Madison Keys nen first round-ah an chak lo.

Thawhlehni zan WTA Dubai Championship-a inkhelah Sania Mirza te hian Russian player pahnih Vernokia Kudermetova leh Liudmila Samsonova te ṭang dun chu darkar khat chhungin 4-6, 0-6 in an hneh lo a ni.

Kum 25 mi Veronika hi singles huangah pawh world number 11 a ni phak a, a ṭanpui Liudmila hi doubles bika world number 13 a ni bawk. Chawlh tum tawh Sania tan chuan vanglai hmang mek hneh chu a harsa ta deuh.

Season hmasa khan Sania hian chawlh a tum thu a lo sawi tawh, mahse chawl loin kuminah a inkhel chhunzawm. Dubai Championship hi a tan tournament hnuhnung ber a nih tur thu a sawi chiang a, tunah chuan a khel zo ta a ni.

Sania Mirza chuan, "Kei hi India player dangte tana entawn tlak bik ka ni hran lo a, an thlen chin tur tuksak theitu pawh ka ni hek lo. Chutihrualin ka thlen chin aia sang thleng thei tur hi rawn chhuak thei se ka duh hle.

"Player beiseiawm tak tak kan hmu ṭhin, mahse college an kal a, chumi hnuah tennis huangah an rawn let tawh meuh lo, an lo kir a nih pawhin beisei angin an thleng sang ngai ta lo. Infiamna huangah chuan 100% rilru pek a ngai," a ti.

Tun dinhmunah India hmeichhe tennis player zinga ranking sang ber chu Ankita Raina (245) a ni a, kum 30 mi a ni tawh. Ranking sang zual 300 chinah Karman Thandi (265) a lang bawk, a lan dan chuan Sania hnung zui mai tur an awm dawn rih lo.

Player hrang hrangin Mirza hi an thlah, thlahtu zingah world number 1 Iga Swiatek pawh a tel. Polish nula chuan, "Nomawi lian bik paruk chawitu, doubles huanga world number 1 pawh ni thei, tennis zinkawng duhawm tak i neih avangin ka lawmpui che.

"Hlim taka tennis chawlhsan turin ka duhsak che a, i kal zelna turah duhsakna ka hlan bawk che," tiin Indian legend a thlah a, tennis player mai bakah infiammi dangte pawhin thlahna thu hi an sawi ve bawk.