Mayor's Cup; Injury time-ah Gibert-a'n chakna goal a khung

Aizawl Day 2023 puala buatsaih Mayor's Cup - Inter Ward Football Tournament semifinal hmasa zawkah Ward No. VII chuan Ward No. IV chu 2-1 in an hneh. RG Stadium-a inkhelah hian Ward No. IV-in Vanlalthlamuana hmangin khung hmasa mah se Freddy Lalrinchhana hmangin Ward No. VII-in siphurh an sut a, injury time-ah pawh extra time-ah Gilbert Lalbiaksanga'n penalty hmangin chakna goal a khung.

Semifinal a nih tawh avangin Mayor's Cup boruak a nung a, team pahnihin tawnhriat nei player an kawl ve ve avangin inkhel a hmuhnawm bawk. Minute 19-na lekah Francis Vanlaldika ball vawrh luh chu Vanlalthlamuana'n a tauh a, keeper Lalchhanhima'n dang mah se a per chu Malsawmfela nau Thlamuana hian chang hmasain awlsam takin Ward No. IV hmahruaina goal a khung.

Ward IV hian hrem vangin Lalnunmawia (Mawitea) an chhawr thei lo a, Ward no. VII-in damloh vangin David Lalrinmuana an chhawr thei bik lo. Team pahnihin player tawnhriat nei ṭha awm lo an tuar ve ve a, danglamna siamtu an awm lo.

Team pahnih an intluk tawk a, minute 75-naah Ward No. IV-in siphurh an sut. Lalruatfela through ball chu Freddy-a'n um lutin, a ball pet hmasak chu Lalawmpuia'n dang mah se a per chu Freddy thoin goal-ah a chantir.

Minute 90 chhungin chak zawk an awm lo a, extra time-ah erawh Ward No. VII an chungnung ta zawk. Final whistle rik hun an ngaihchan ṭhup laiin ball-in box chhungah Ward No. IV player kut a per a, Tata Trusts COE chhuak Gilbert Lalbiaksanga'n penalty aṭangin chakna goal a khung.

Ward No. IV coach HC Zarzoliana chuan, "Kan squad a ṭha tawk lo. Chutihrualin kan vanduai ve bawk. Penalty turah ka ngai lo. Ball khan defender kut kha fuh lo se a 'out' dawn a, chu chauh ni loin ball-in a per vang chauhin defender kut kha a taksa aṭangin a kau. Penalty kan chawi hnuah khan penalty hmu ve thei kan ni a, min pe lo," tiin an vanduai thu Vanglaini a hrilh.