Barca-in Neymar an la let dawn lo

La Liga-a an champion loh avanga sawisel hlawh Barcelona president Josep Maria Bartomeu chuan Neymar lei tur anga sawi thawm awm chu a pha a, Covid-19 buaina karah Brazilian forward lak let chu thil theih loh a nih thu a sawi. 

Bartomeu chuan, "Tun ang boruaka Neymar sawi chu thil inhmeh lo tak a ni a, PSG-in hralh an duh lo bawk a ni," a ti a, Covid-19 chuan sum lakluh kawngah European club lian tam tak a nghawng thu a 

sawi bawk. 

Barca President chuan, "European club lian ho chu min nghawng vek a, kum khat mai ni loin kum thum emaw kum li awh tur thil a ni bawk. March - June inkarah khan eruo tluklehdingawn 1.1 chu lakluh kan beisei a, mahse euro maktaduai 200 vel laiin kan beisei zat hi kan phak lo a ni," a ti.

Catalan club hi Inter Milan striker Lautaro Martinez nen sawizawm an ni bawk a, mahse he inbiakna pawh hi tawpsan rih a ni. Bartomeu chuan, "Lautaro chungchangah Inter hi kan dawr ngei a, mahse inbiakna hi a tawp rih. Kan dinhmun enin sum tam tak senna chi a ni rih lo, " tiin a sawi. 

Hetihlai hian Arthur chungchang pawh Bartomeu hian a sawi ri a, Juventus aṭanga Bosnian midfielder Miralem Pjanic an lei dawna an indawrna anga Juve lama an kaltir tur Arthur hian club thar an neih hnuah kawhmawh a bawl. 

Bartomeu chuan, "Champions League tawp thlenga kan tana khel turin inremna kan neihpui a, mahse chawlh hahdam zawkna hun kan pek hnuah a lo kir tawh lo a ni," a ti a, Arthur-a chet dan chu an chhui thu a sawi.